राष्ट्रियसभाको सीट भागबन्डाका लागि कांग्रेस-माओवादीबीच छलफल, यस्तो छ प्रस्तावित मापदण्ड

काठमाडौं । सत्ता गठबन्धनमा राष्ट्रिय सभाको निर्वाचनमा सीट बाँडफाँटको विषयमा कांग्रेस र माओवादीबीच छलफल भएको छ।

गठबन्धनमा सीटको भागबन्डा मिलाउन कांग्रेसका शीर्ष नेताहरू बालुवाटार पुगेर छलफल गरेका हुन्।

बैठकमा माओवादी केन्द्रबाट प्रधानमन्त्री पुष्पकमल दाहाल प्रचण्ड, वरिष्ठ उपाध्यक्ष नारायणकाजी श्रेष्ठ र उपमहासचिव वर्षमान पुन सहभागी थिए भने कांग्रेसबाट सभापति शेरबहादुर देउवा, उपसभापति पूर्णबहादुर खड्का, महामन्त्री गगनकुमार थापा, नेता रमेश लेखक सहभागी थिए।

दुई दलबीचको छलफलमा यसअघिको मतभार, अहिलेको अवस्थाबारे प्रारम्भिक छलफल भएको छ। त्यही आधारमा गठबन्धनमा सीट भागबन्डाको तयारी छ स्रोतले भन्यो ।

शीर्ष नेताबीच अब गठबन्धनका अन्य दलसँग पनि छलफल गरेर निष्कर्षमा पुर्‍याउने सहमति बनेको छ ।

माघ ११ गते राष्ट्रियसभाको निर्वाचनमा हुँदैछ। ११ गते हुने निर्वाचनको लागि यही २३ गते उम्मेदवारी दर्ता गर्ने कार्यसूची रहेकाले गठबन्धन घटकले भागबन्डाको छलफल थालेका हुन् ।

गठबन्धन गरेर जान तयार रहे पनि अहिलेसम्म सीटको भागबन्डाको कुरा मिलेको छैन ।