भारत-पाकिस्तान म्याच हेर्न गएकी उर्वशी ‘गोल्डेन आइफोन’ हराएर तनावमा

काठमाडौं । शनिबार भारतले पाकिस्तानमाथि एसीसी विश्वकप क्रिकेटको पहिलो खेल जितेको उत्सव मनाइरहँदा यता बलिउड अभिनेत्री उर्वशी रौटेला भने मोबाइल हराएको तनावमा छिन् । मोबाइल पनि चानचुने होइन, गोल्ड कोटेड आइफोन । अहमदाबादको नरेन्द्र मोदी स्टेडियममा भएको उत्सवबीचमा उनको २४ क्यारेट सुनको आइफोन हराएको हो ।

सुनको फोन हराएपछि रौटेलाले आफूलाई ठूलो व्यक्तिगत क्षति भएका बताउँदै प्रहरीमा उजुरी दिएकी छिन् । उजुरीसँगै उनले आफ्नो सामाजिक सञ्जालमा औपचारिक उजुरीको स्न्यापसट पोष्ट गर्दै सबैसँग मद्दतको आह्वान पनि गरेकी छन् ।

उनले लेखेकी छिन,‘नरेन्द्र मोदी स्टेडियम, अहमदाबादमा मेरो २४ क्यारेट रियल सुनको फोन हरायो । यदि कसैले मेरो फोन देख्नुभयो भने, कृपया मलाई जतिसक्दो चाँडो सम्पर्क गर्नुहोला । र, मद्दत गर्न सक्ने अरुलाई पनि ट्याग गर्दिनुहोला ।’