एक साताअघि सर्‍यो ‘वानर सेना’ को प्रदर्शन मिति

काठमाडौं । चलचित्र ‘वानर सेना’ को प्रदर्शन मिति एक साताअघि सारिएको छ । अब यो चलचित्र असोज १९ बाट प्रदर्शन हुने भएको हो । यसअघि कात्तिक ४ गतेबाट प्रदर्शनको तयारीमा रहेका दुई फिल्ममध्ये ‘परदेशी २’ असोज २६ मा प्रि-पोण्ड भएपछि ‘वानर सेना’ निर्माताले आफूलाई अन्याय भएको भन्दै निर्माता संघमा उजुरी दिएका थिए ।

बिहीबार निर्माता संघको न्यायिक समितिले दुवै फिल्मको निर्माण टीमलाई राखेर छलफल गराएको थियो । न्यायिक समितिका सभापति उदय सुब्बा, निर्माता संघका कार्यसमिति सदस्य किरण नेपाली, वितरक करण श्रेष्ठ, ‘वानर सेना’ का निर्माता युवराज गिरी र ‘परदेशी २’ का निर्माता राजेश वंशलसहितको छलफलमा सहमति जुटेको हो ।

सहमतिसँगै ‘वानर सेना’ असोज १९ र ‘परदेशी २’ असोज २६ बाट प्रदर्शनमा जाने टुंगो लागेको हो ।

गिरी ग्राण्ड फिल्मस्को प्रस्तुतिमा निर्माण भएको ‘वानर सेना’ मा निर्देशक अर्पण गिरी (अरमान जंग), आरजु प्रसाई, किशोर खतिवडा, सुरवीर पण्डीत, अर्जुन गुरुङ, किशन बाबु बस्नेत, राजन निरौला, सुनिता श्रेष्ठ, सुरेश साहु, कमला विष्ट, रमेश सोडारी, युवराज गिरी, राहुल यादव, ज्ञानेन्द्र थापा, बिशाल बराल, बालकलाकार मास्टर अमित पौडेल र बिशेष भुमिकामा कामेश्वर चौरासिया र तेजस्वी बास्कोटाको अभिनय छ ।

फिल्मको कथा, पटकथा तथा संवाद पनि स्वयंम निर्देशक गिरीले नै लेखेका हुन् । युवराज गिरीको लगानी रहेको फिल्मलाई करण श्रेष्ठ क्रेजीका रिच इन्टरटेनमेन्ट र एफडी कम्पनीले वितरण गर्दैछन् ।