वाग्नरको कुनै अस्तित्व छैनः पुटिन

काठमाडौं । रुसी राष्ट्रपति भ्लादिमिर पुटिनले रुसी भाडाका सैनिक समूह वाग्नरको अन्त्य भएको बताएका छन् । बिहीबार रुसको अखबार कोमेरसान्तसँग कुराकानी गर्दै पुटिनले निजी सैन्य टुकडीलाई मान्यता नदिने बताएका छन् ।

रुसी सरकारी स्वामित्वको विश्व च्यानल आरटीका अनुसार मस्कोमा जारी प्रविधि मेलामा बोल्दै पुटिनले यस्तो बताएका हुन् । पत्रिकासँग पुटिनले भनेका छन्, ‘हाम्रो निजी सेना कम्पनीहरुका बारेमा कुनै कानुन छैन । त्यसैले वाग्नरको कुनै अस्तित्व छैन ।’

रुसी सरकारले बजेट दिएर संचालन हुँदै आएको निजी सैन्य कम्पनी वाग्नरले गत जुन २३ मा सैन्य विद्रोह प्रयास गरेको थियो । त्यसबाट कुनै रत्तपात नभइकन अन्त्य भएको थियो । अहिले वाग्नर समूहका नाइके येभ्जेनी प्रिगोजिन रुसी छिमेकी बेलारुसमा पुगेका छन् ।

उनलाई बेलारुसी राष्ट्रपति एलेक्जेन्डर लुकासेन्कोले बेलारुस निम्तो गरेका थिए । रुसी सैनिक र वाग्नरको दोहोरो भिडन्तको संभावित रक्तपात रोक्न पनि लुकासेन्कोले भूमिका खेलेका थिए । अहिले वाग्नरका कतिपय सदस्यहरु बेलारुस पुगेका छन भने कतिपयले रुसी सेना प्रवेश गरेको रुसी मिडियाहरुले उल्लेख गरेका छन् ।