माओवादी प्रदेश १ को सरकारमा जान्छ, इन्द्र आङ्बोको कुरा व्यक्तिगत हो : हरिबोल गजुरेल

विराटनगर । नेकपा माओवादी केन्द्रका उपमहसचिव हरिबोल गजुरेलले पार्टीको आधिकारिक निर्णयलाई सबैले मानेर जानुपर्ने बताएका छन् ।

नेपाल प्रेससँग कुरा गर्दै उनले मुख्यमन्त्री र सभमुख बाँडफाँटका विषयमा गठबन्धनमा सहमति भइसकेकाले यसलाई मान्नुपर्ने बताए । प्रदेश १ मा आलोपालो सरकार चलाउने सहमति भएको भन्दै संसदीय दलका नेता इन्द्र आङ्बोले सरकारमा माओवादी नजाने बताइरहेका बेला गजुरेलले पार्टीको धारणा प्रष्ट्याएका हुन् ।

प्रदेश १ को मुख्यमन्त्री एमालेको र सभामुख माओवादीको हुने सहमति भइसकेकाले माओवादी प्रदेश १ मा सरकारमा जाने उनले बताए ।

उनले भने, ‘माओवादी प्रदेश १ का संसदीय दलका नेताले मुख्यमन्त्री आलोपालोमा नभए सरकारमा नजाने भन्ने कुरा उहाँको व्यक्तिगत हो । पार्टीले गरेको निर्णय उहाँले मान्नुपर्छ । हामी प्रदेश १ सरकारमा जान्छौं, यो पार्टीले गरेको सहमति हो ।’