दैलेख एमालेलाई उम्मेदवार छान्न मुस्किल, एक नगरपालिकाबाहेक सबैमा मतदान हुने सम्भावना

सुर्खेत । दैलेख एमालेलाई स्थानीय चुनावका लागि सर्वसम्मत उम्मेदवार छान्न मुस्किल परेको छ । जिल्लाको दुई नम्बर क्षेत्रको चामुण्डा विन्द्रासैनी नगरपालिका बाहेकका सबै स्थानीय तहमा मतदानमार्फत उम्मेदवार छान्नुपर्ने स्थिति आएको हो । गठबन्धनविरुद्ध एक्लै चुनाव लड्न लागेको एमालेलाई उम्मेदवार छान्नै सकस भएपछि कार्यकर्ता निराश भएका छन् ।

नेकपा एमाले आठबीस नगरप्रमुखमा आठ र उपप्रमुखका लागि चारजनाले दाबी गरेका छन् । ठाँटीकाँध गाउपालिकामा ११ जनाले अध्यक्षमा दाबी गरेका छन् भने पाँचजनाले उपाध्यक्षमा दाबी गरेका छन् । यहाँ पनि सहमतिको प्रयास जारी भए पनि सर्वसम्मत उम्मेदवार चयन हुने सम्भावना निकै कम छ ।

भैरवी गाउँपालिकामा अध्यक्षमा सातजना, उपाध्याक्षमा पाँचजना उम्मेदवार बन्न उत्सुक देखिएका छन् । यहाँ सर्वसम्मत गर्ने प्रयास भए पनि चुनाव नै हुने सम्भावना देखिएको छ ।

दुल्लु नगरपालिकामा नगरप्रमुखका लागि सातजनाको दाबी छ । यहाँ पनि उम्मेदवार छान्न निर्वाचन प्रक्रिय सुरु गर्ने तयारी भइरहेको छ । तर चामुण्डा विन्द्रासैनी नगरपालिकामा ६ वडामध्ये चार वडामा सर्वसम्मत उम्मेदवार चयन भइसकेको छ । यहाँ सर्वसम्मत उम्मेदवार चयन हुने देखिएको छ ।

अघिल्लो चुनावमा दुल्लुमा मेयरबाहेक उपप्रमुखसहित कार्यपालिकामा बहुमत एमालेले बहुमत ल्याएको थियो । अरु चारै तहमा एमालेले जितेको थियो ।

दैलेख एमाले नेता प्रेम बुढा सर्वसम्मत नै उम्मेदवार चयन होस् भन्ने आफूहरुको चाहना रहेको बताउँछन् ।