आँचलको साउथ इन्डियन फिल्म ‘हिटम्यान’ नेपाल र भारतमा एकसाथ रिलिज हुने

काठमाडौं । नेपाली कलाकार र लोकेसनलाई लिएर निर्माण गरिएको दक्षिण भारतीय फिल्म हिटम्यान कोरोनाभाइरस महामारीको स्थितीमा सुधार भएपछि नेपाल र भारतमा एकैसाथ रिलिज हुने भएको छ ।

बिहीबार राजधानीमा आयोजित पत्रकार सम्मेलनमा फिल्मका निर्माता, निर्देशक र कलाकारले फिल्मबारे जानकारी दिए । नेपाली मूलका विष्णु अधिकारीको निर्देशन र दीपक अधिकारीको निर्माणमा बनेको फिल्ममा आँचल शर्मा नायिकाको रुपमा छिन् ।

सोल्टी क्राउन प्लाजामा भएको प्रेसमिटमा फिल्मको टीजर ट्रेलर पनि देखाइयो । निर्देशक समेत रहेका अभिनेता विष्णु अधिकारीले नेपालको पोखरा लगायतको प्राकृतिक सौन्दर्यलाई फिल्ममा समावेश गरिएको र नेपालको पर्यटनलाई फाइदा पुग्ने बताए ।

‘फिल्म रिलिज भएपछि साउथ इन्डियन फिल्महरु नेपालमा रिलिजको लागि आउने सम्भावना छ’ उनले भने । उनले नायिका शर्माको कामको समेत प्रशंसा गरे ।

अभिनेता प्रशान्त ताम्राकारले नेपालमा छायांकन भएको दृश्यलाई नेपाली भाषामै स्वरांकन गरिने र तलेगु भाषामा सबटाइटल हुने बताए । नेपाली दर्शकलाई यो कुरा खुशिपूर्ण भएको उनको भनाई छ ।

आँचल फिल्ममा नेपालतर्फको मुख्य भूमिकामा छिन् । पत्रकार सम्मेलनमा उत्साहित सुनिएकी उनले स्क्रिप्ट मनपरेपछि आफूले आफूले प्रोजेक्टमा काम थालेको अनुभव सुनाइन् । ‘स्क्रिप्ट सुनेको छोटो समयमै फिल्म गर्ने निर्णय लिएकी हुँ’ उनले भनिन्, ‘निर्देशक र निर्मातामा पनि कामलाई लिएर प्यासन देखेको थिएँ ।’

हिटम्यानमा अभिनय गर्दा आफूले भाग्यमानी महसुस गरेको आँचलको कथन छ । फिल्ममा उनको पात्रबारे खुलाइएको छैन ।

निर्माता दीपक अधिकारीले नेपालमा फिल्म छायांकन गर्दा रमाइलो महसुस भएको बताए । नेपालको पर्यटन र फिल्म क्षेत्रलाई चलायमान बनाउन यो फिल्मले योगदान गर्ने उनको भनाई छ । दक्षिण भारतमा समेत फिल्म प्रतीक्षित बनेको उनको भनाई छ ।