एमाले विधान महाधिवेशन समापन समारोह: जवाफ दिँदै नेताहरू (लाइभ)

काठमाडौं । नेकपा एमालेको प्रथम विधान महाधिवेशन आज सकिँदैछ ।

ललितपुरको गोदावरीस्थित सनराइज सम्मेलन केन्द्रमा तीन दिनदेखि जारी महाधिवेशन राजनीतिक, सांगठनिक र विधान संशोधन प्रतिवेदन पारित गर्दै समापन गर्न लागिएको हो ।

१० समूहमा विभाजित प्रतिनिधिहरूले प्रतिवेदनमाथि समूहगत छलफलपछि दिएका सुझावउपर प्रतिवेदन प्रस्तुतकर्ता नेताहरूले जवाफ दिएर महाधिवेशन सकिनेछ ।

अहिले उपमहासचिव विष्णु पौडेलले विधान संशोधन प्रस्तावमाथि उठेका प्रश्नहरूको जवाफ दिइरहेका छन् । त्यसपछि महासचिव ईश्वर पोखरेलले संगठनात्मक प्रस्ताव र अध्यक्ष केपी ओलीले राजनीतिक प्रतिवेदनमाथि उठेका जिज्ञासाहरुको जवाफ दिने कार्यसूची छ ।

विधान महाधिवेशनमा पार्टीको निर्वाचन आयोग पनि गठन गर्ने कार्यसूचि छ । त्यसै गरी समसामयिक प्रस्ताव पनि महाधिवेशनले पारित गर्ने एमालेले जनाएको छ ।

शुक्रबार अध्यक्ष ओलीले उद्घाटन गरेको महाधिवेशनमा देशभरबाट ६ हजारभन्दा बढी प्रतिनिधि सहभागी छन् ।