२०२२ को लन्डन म्याराथन अक्टोबरमा हुने

काठमाडौं । लन्डन म्याराथन २०२२ अक्टोबर २ मा हुने भएको छ । पहिलेदेखि अप्रिलमा हुँदै आए पनि लगातार तेस्रो पटक अर्को महिनामा हुने भएको हो ।

प्रतिष्ठित लन्डन म्याराथनका इभेन्ट डाइरेक्टर ह्युज ब्राशेरले पूर्ण क्षमतामा दर्शक आउने धेरै मौका भएकाले अक्टोबरमा गर्न लागिएको प्रतिक्रिया दिएका छन् ।

गत वर्ष शुरा किताताले पुरुषतर्फको उपाधि जितेका थिए भने महिलातर्फ ब्रिगिड कोस्गेईले आफ्नो उपाधि रक्षा गरेकी थिइन् । तर, दर्शक नभएकाले धावकले पूर्ण रूपमा दौडको आनन्द लिन पाएका थिएनन् ।

यो वर्षको संस्करण पनि अक्टोबर ३ मा हुने तय भइसकेको छ भने २०२३ को लन्डन म्याराथन भने पहिले जस्तै अप्रिलमै गर्ने तयारी भएको ब्राशेरले जानकारी दिएका छन् ।