खोपबारे देउवालाई माधव नेपालको सुझाव- घोषणा गरेर आनन्दित नबन्नुहोस्

काठमाडौं । नेकपा (एमाले)का वरिष्ठ नेता माधवकुमार नेपालले प्रधानमन्त्री शेरबहादुर देउवाले खोपलाई प्राथमिकता दिएको विषय ठीक भए पनि घोषणा गरेर आनन्दित नबन्न सुझाव दिएका छन् ।

राजधानीमा अखिल फोर्सको भेलालाई सम्बोधन गर्दै नेता नेपालले भने, ‘तपाईंले घोषणा गर्नु भएको छ, ठीक छ । तर, घोषणा गरेर आनान्दित नबन्नुहोस् ।’

नेपालका नेताहरूमा घोषणा गर्ने तर काम नगर्ने बानी रहेको भन्दै देउवालाई त्यस्तो नबन्न पनि सुझाव दिएका छन् ।

‘नेपालका नेताहरुको बानी छ, घोषणा गर्ने तर काम नगर्ने,’ नेपालले भने, ‘तपाईं यस्तो नबननुहोस् ।’

खोपमा निमुखालाई प्राथमिकता दिन पनि उनले आग्रह गरे । नेपालले भने, ‘तपाईंले जनतालाई बचन दिनुभएको छ- पहिलो प्राथमिकता खोप हो, दोस्रो प्राथमिकता खोप हो र तेस्रो प्राथमिकता खोप हो । त्यो काम गर्नुहोस्, निमुखा जनतालाई प्राथमिकता दिनुहोस् ।’