एरिकसनको समर्थनमा खेल रोकेर ताली बजाइने

काठमाडौं । फिनल्यान्डविरुद्धको खेलका दौरान कार्डिक एरेस्ट भएर मैदानमै ढलेका डेनिस प्लेमेकर क्रिस्टियन एरिकसनलाई ताली बजाएर समर्थन गर्न खेल रोक्ने भएको छ । शनिबार भएको खेलको ४२औं मिनेटमा एक्कासी मैदानमा ढलेर अचेत बनेका एरिकसन कोपनहेगनकै अस्पतालमा स्वास्थ्यलाभ गरिरहेका छन् ।

डेनिस समर्थकहरूले एरिकसनको समर्थनमा खेलको १०औं मिनेटमा ताली बजाउने योजना बनाइरहेका छन् ।

‘हामी बल टच लाइन बाहिर फालेर ताली बजाउने छौं,’ बेल्जियमका फरवार्ड रोमेलु लुकाकुले भने, ‘हाम्रो टीमका धेरै खेलाडीले उनीसँग खेलेका छौं । तर, भोलिको खेल जितका लागि हुनेछ र त्यो कठिन हुने निश्चित छ ।’

खेलको दशौं मिनेट चयन गर्नुको कारण एरिकसनको जर्सी नम्बर हो । उनी १० नम्बर जर्सी लगाएर डेनमार्कका लागि खेल्ने गर्छन् ।