कतारसँगको सीमा खोल्ने साउदी निर्णयको नेपालद्वारा स्वागत

काठमाडौं । कतारसँगको सीमा खोल्ने साउदी अरबको निर्णयको नेपालले स्वागत गरेको छ । परराष्ट्र मन्त्रालयले बुधबार एक प्रेस विज्ञप्ति जारी गर्दै कतारसँगको स्थल, हवाई र समुन्द्री सीमा खोल्ने साउदी सरकारको निर्णयको स्वागत गरेको हो।

‘नेपाल सरकार स्थलगत, हवाई र समुन्द्रि सीमा खोल्ने साउदी अधिराज्य र कतार अधिराज्यको निर्णयको स्वागत गर्दछ,’ प्रेस विज्ञप्तिमा भनिएको छ, ‘गल्फ कोअपरेसन काउन्सिल (जिसससी) देशका नेताहरुले हिजोको सम्मेलनबाट लिएको कदमले केही सदस्य राष्ट्रहरुबीचको विवादको समाधान गर्न तथा यो क्षेत्रमा स्थायित्व र सहकार्य बढाउन योगदान गर्नेछ भन्ने नेपाल विश्वास गर्छ ।’

जिसीसीका देशहरुसँगको सम्बन्धलाई नेपालले महत्व दिएको बताउँदै विज्ञप्तिमा भनिएको छ, ‘नेपाल सरकार र नेपाली जनता खाडी क्षेत्रमा सधै शान्ति, समृद्धि र विकास चाहान्छन् ।’

मंगलबार साउदी अरबले कतार र अन्य खाडी मुलुकसँगको स्थलगत, हवाई र समुन्द्रि सीमा पुनः सुचारु गर्ने निर्णय गरेको थियो । साउदीको यो कदमले रियाद र उस नेतृत्वको गठबन्धनले कतारविरुद्ध लगाएको नाकाबन्दीको हल निकाल्ने अपेक्षा गरिएको छ ।

सन् २०१७ मा साउदी, युएई, बहराइन र इजिप्टले कतारसँग कूटनीतिक, व्यापारिक तथा यातायात सम्बन्ध विच्छेद गरेका थिए ।