अवैध उत्खननले बस्ती जोखिममा परेपछि केराबारीका बासिन्दाले घेरे गाउँपालिका

विराटनगर । क्रसर उद्योगले बस्ती विस्थापित हुन लागेको भन्दै मोरङ केराबारीका स्थानीयबासीले गाउँपालिकामा प्रदर्शन गरेका छन् ।

माहादेव मिनिरल कम्पनी र शिवम क्रसर उद्योगविरुद्ध स्थानीयबासी आन्दोलित भएका हुन् । केराबारी-८ आँमजुगीबासीले बिहानैबाट गाँउपालिका कार्यालय घेरेका छन् ।

स्थानीय खदम खोलामा राखिएको क्रसरले मापदण्डविपरीत ढुंगा र गिट्टी उत्खनन् गरेकाले बस्तीतर्फ खोला पसेपछि स्थानीयबासी विरोधमा उत्रिएका हुन् । पटकपटक गाउँपालिका अध्यक्ष र उपाध्यक्षलाई समस्या समाधानका लागि आग्रह गरेपनि बेवास्ता गरेको उनीहरूको गुनासो छ ।

गाउँपालिकामा ताला लगाउन पुगेका आक्रोशित स्थानीयबासीलाई प्रहरीले रोकेको छ । भीड नियन्त्रणका लागि प्रहरीको बाक्लो उपस्थिति छ । उनीहरूले जनप्रतिनिधिविरुद्ध नाराबाजीसमेत गरिरहेका छन् । स्थानीयको प्रदर्शनका कारण गाउँपालिकाको काम ठप्प भएको छ ।

अव्यवस्थित र अवैध उत्खनन्का कारण आँमजुगीका ५०० परिवार विस्थापित हुने अवस्था आएको पीडितमध्येका एक अमृत थापाले बताए ।