काठमाडौंको जिल्लासभामा कांग्रेसको बहुमत, एकल जिसस बनाउनसक्ने

काठमाडौं । नेपाली कांग्रेसले काठमाडौंमा एकल जिल्ला समन्वय समिति गठन गर्नसक्ने भएको छ । निर्वाचन परिणामअनुसार काठमाडौंको जिल्लासभामा कांग्रेसको एकल बहुमत सुनिश्चित भइसकेको छ ।

संविधानले जिल्लाभरका स्थानीय तहका प्रमुख र उपप्रमुख सदस्य रहने जिल्लासभाको व्यवस्था गरेको छ । जिल्लासभाले १ जना प्रमुख, १ जना उपप्रमुख र कम्तीमा १ जना दलित वा अल्पसंख्यकसहित बढीमा ९ जना सदस्य रहेको जिल्ला समन्वय समितिको निर्वाचन गर्नेछ ।

काठमाडौंमा १ महानगर र १० नगरपालिका छन् । जसअनुसार जिल्लासभा २२ सदस्यीय हुनेछ । २२ सभासदमध्ये कांग्रेसका १२ जना हुने निश्चित भइसकेको छ ।

कांग्रेसबाट जिल्लासभामा दक्षिणकाली नगरपालिकाका प्रमुख र उपप्रमुख, कीर्तिपुर नगरपालिकाका प्रमुख र उपप्रमुख, चन्द्रागिरी नगरपालिकाका प्रमुख, नागार्जुन नगरपालिकाका प्रमुख, तारकेश्वर नगरपालिकाका प्रमुख र उपप्रमुख, टोखा नगरपालिकाका उपप्रमुख, गोकर्णेश्वर नगरपालिकाका प्रमुख, कागेश्वरी मनहरा नगरपालिकाका प्रमुख र शंखरापुर नगरपालिकाकी उपप्रमुख गरी १२ जना रहनेछन् ।

२२ सदस्यीय जिल्लासभामा एकल बहुमत हुने भएकाले कांग्रेसले जिल्ला समन्वय समितिको प्रमुख र उपप्रमुख दुवै आफैसँग राख्ने सम्भावना बढी छ । सदस्यहरुमा भने गठबन्धनमा रहेका दलहरुको प्रतिनिधित्व गराउन सकिने कांग्रेसका एक नेताले जानकारी दिए ।