२ वर्षयता टी-२० अन्तर्राष्ट्रिय नखेली विश्वकप पुगेका कमल

काठमाडौं। वेस्ट इन्डिज ‘ए’विरुद्ध घरेलु मैदानमा ५ खेलको टी-२० शृङ्खला हुनै लाग्दा सुरुमा घोषणा गरिएको १६ सदस्यीय टोलीमा थिएनन्- कमलसिंह ऐरी । तर अन्तिम समयमा नेपाल क्रिकेट संघ (क्यान) ले चार जना खेलाडीलाई समावेश गर्दा फास्ट बलर कमलको नाम छुटेन ।

नेपालले उक्त शृङ्खला खेल्न थालेको केही दिनपछि विश्वकपका लागि घोषणा गरिएको १५ सदस्यीय राष्ट्रिय टोलीमा कमलले पनि बाजी मारेका थिए।

कमलले २ वर्षयता टी-२० अन्तर्राष्ट्रिय खेलहरू खेलेका छैनन्। अन्तिम पटक सन् २०२२ को अप्रिलमा उनले मलेसियाविरुद्ध कीर्तिपुर मैदानमा खेलेका थिए। त्यस खेलमा उनले २० रन खर्चिएर २ विकेट लिएका थिए। कमल त्यसयता लामो समय चोटबाट गुज्रिए। गत मार्चमा नेपाल भ्रमणमा आएको आयरल्यान्ड ‘ए’सँग खेल्ने नेपाल ‘ए’मा स्थान बनाएर उनले मैदानमा पुनरागमनको प्रयास गरेका थिए।

आयरल्यान्ड ‘ए’विरुद्ध उनले तीन वटा टी-२० खेल्दा ५ विकेट लिए । उनले पहिलो खेलमा ३९ रन खर्चिएर ३ विकेट हात पारेका थिए। आयरल्यान्ड ‘ए’विरुद्ध भएको ५० ओभरको पहिलो खेलमा २१ रन खर्चिएर ४ विकेट लिएका थिए।

दोस्रो खेलमा पनि १ विकेट लिएर ३३ रन खर्चिएका थिए। कमलले आयरल्यान्ड ‘ए’विरुद्ध खेलेका हरेक खेलमा विकेट हात पारेका थिए। त्यसपछि वेस्ट इन्डिज ‘ए’विरुद्ध २ वटा टी-२० खेल्दा उनले कुल ८६ रन खर्चिएर एक विकेट हात पारेका थिए।

कमलले सिनियर अन्तर्राष्ट्रिय क्रिकेटमा ४ वर्षअघि डेब्यु गरेका हुन्। सन् २०२० को फेब्रुअरीमा घरेलु मैदानमा ओमानविरुद्ध खेल्दै उनले एकदिवसीय अन्तर्राष्ट्रियमा डेब्यु गरेका थिए। त्यस खेलमा ४ ओभर बलिङ गरेका उनले २९ रन खर्चिएका थिए भने विकेट लिन सकेका थिएनन्।

उनले टी-२० अन्तर्राष्ट्रिय क्रिकेटमा भने सन् २०२१ को अप्रिलमा मलेसियाविरुद्ध खेल्दै डेब्यु गरेका थिए। त्यस खेलमा उनले १६ रन खर्चिएर ३ विकेट लिएका थिए।

कमलले हालसम्म १० टी-२० अन्तर्राष्ट्रिय खेल खेल्दै १५ विकेट लिएका छन्। उनको बलिङ इकोनोमी ६.४९ छ। उनले एकै खेलमा १५ रन खर्चिएर ३ विकेटसम्म लिएका छन्।

सन् २०२२ को फेब्रुअरीमा भएको खेलमा उनले ओमानविरुद्ध उक्त सफलता हात पारेका थिए। यस्तै एकदिवसीय अन्तर्राष्ट्रिय क्रिकेटमा उनले ३ खेल खेल्दै २ विकेट लिएका छन् भने ५.७३ बलिङ इकोनोमी छ।

नेपाली टोलीमा कमलबाहेक सोमपाल कामी, करण केसी, अविनाश बोहरा, प्रतिस जिसी र गुल्सन झा पनि फास्ट बलरका रूपमा छन्।

नेपाली क्रिकेट खेलाडीहरुबारे नेपाल प्रेसका थप सामग्री पढ्नुहोस्-

1. टी-२० विश्वकपअघि कुशलको खराब फर्म नेपालको चिन्ता
2. ‘रेड हट’ फर्ममा रोहित, फ्यानलाई बनाउँदैछन् मोहित
3. अनुभवी ओपनर आसिफबाट आशा
4. अस्थिर फर्मबाट गुज्रिरहेका ललित: सन्दीपको अभावले मनोवैज्ञानिक दबाब
5. सन्दीप जोरा- नेपालका नवोदित ब्याटिङ स्टार
6. १६७ को स्ट्राइक रेटमा ब्याटिङ गरिरहेका कुशल
7. सन्दीपलाई पछ्याइरहेका बलर, १० नम्बरमा आएर खेल जिताउन सक्ने ब्याट्सम्यान
8. ‘थ्रीडी क्रिकेटर’ दीपेन्द्र : नेपालको भरोसाका केन्द्र
9. ‘योर्कर विशेषज्ञ’ अविनाश: जो डेथ ओभरमा अक्सर चुक्छन्
10. सोमपाल कामी- धार खोजिरहेको नेपालको पुरानो हतियार
11. सागर ढकाल- नेपालले खोजिरहेका नयाँ विशेषज्ञ स्पीनर
12. प्रतिश जिसी- नेपालको फास्ट बलिङमा अविनाश, सोमपाल र करणका विकल्प
13. एकदिवसीयको प्रदर्शनले टी-२० विश्वकपमा अटाएका अनिल जो बन्दैछन् आसिफलाई ‘थ्रेट’
14. २ वर्षयता टी-२० अन्तर्राष्ट्रिय नखेली विश्वकप पुगेका कमल
15. कहिल्यै शून्यमा आउट नभएका गुल्शन