म्यासेन्जरमा चिटिङ गराउने शिक्षक हाजिरी जमानीमा छुटे, बरामद भएका मोबाइल फरेन्सिक ल्याबमा पठाइने

दाङ । कक्षा १२ को परीक्षामा म्यासेन्जर ग्रुपबाट चिटिङ गराएको अभियोगमा पक्राउ परेका दुईजना शिक्षक आज हाजिरी जमानीमा छुटेका छन् ।

फेसबुक म्यासेन्जर मार्फत कक्षा १२ का विद्यार्थीलाई चिटिङ गराएको पाइएपछि हिमाल ऐकाडेमी तुलसीपुरका विशेष श्रेष्ठ र शहीद स्मृति मावि बनकट्टीका शिक्षक यज्ञ केसीलाई प्रहरीले वैशाख १८ गते पक्राउ गरेको थियो ।

उनीहरूलाई बोलाएको बेला उपस्थित हुनेगरी आफन्तको जिम्मा लगाइएको इप्रका तुलसीपुरका प्रमुख डिएसपी ठाकुर प्रसाद पोखरेलले जानकारी दिए ।

डीएसपी पोखरेलका अनुसार परीक्षार्थीबाट बरामद भएका चिट चोर्न प्रयोग गरिएका मोबाइल डिजिटल फरेन्सी ल्याबमा पठाइने र त्यसको रिपोर्टका आधारमा थप कार्वाही प्रक्रिया अघि बढाइने छ ।

प्रहरीका अनुसार चिटिङ गर्न बनाइएका ग्रुपमा राखिएका प्रश्र र उत्तर रिमुभ गरिएको छ । रिमुभ गरिएका सामग्री रिकभरकालागि फरेन्सी ल्याबमा पठाउन लागिएको हो ।

तुलसीपुर उपमहानगरले अनुगमनका क्रममा तुलसीपुरका ज्ञानज्योती,तुलसी,हिमाल ऐकाडेमी,रक्षाचौर मावि लगाएतका विद्यालयका परीक्षार्थीबाट बरामद भएका मोबाइल प्रहरीलाई जिम्मा लगाएको छ ।