‘द डान्स योद्धा : ब्याटल अफ मुभ्स’ आउँदै, भोटिङ सिस्टमविना नै विजेता घोषणा

काठमाडौं । टेलिभिजन रियालिटी शो ‘द डान्स योद्धा : ब्याटल अफ मुभ्स’ को घोषणा गरिएको छ । तीन चरणमा विभाजन गरिएको शोको बिहीबार राजधानीमा आयोजित एक कार्यक्रमबीच घोषणा गरिएको हो ।

शोको निर्देशन शुभम् भुजेलले गरिरहेका छन् । उनका अनुसार शोको पहिलो चरणमा काम ‘डिजिटल अडिसन’ लिने काम भइरहेको छ । मंसिर पहिलो हप्तापछि सेमिफाइनल राउण्ड सुरू हुनेछ । यही राउण्डबाट शो टेलिभिजनमा समेत प्रसारणको तयारी छ ।

‘अहिले विभिन्न टेलिभिजन च्यानलसँग कुरा भइरहेकाले कुन च्यानलबाट प्रसारण हुने पक्का भैसकेको छैन् । चाँडै टेलिभिजन च्यानल, डिजिटल पार्टनर र पुरस्कार राशी घोषणा गरिनेछ’, प्रोजेक्ट संयोजक मानव सिवाकोटीले बताए ।’

अन्य शोहरू भोटिङका कारण निकै विवादिन बनेकाले पनि आफूहरूले भोटिङ सिस्टम नै नराखेको उनले बताए ।

रियालिटी शोको निर्णायक मण्डलमा कोरियोग्राफर गम्भीर विष्ट, अभिनेत्री वर्षा राउत र वाइल्ड रिपर्ज क्रिउका सुरेन राई छन् । निर्णायक मण्डलका संयोजक विष्टले पहिलो पटक नेपालमा केही फरक अनि भोटिङ सिस्टमविना नै विजेता घोषणा गर्नुपर्ने भएकाले निकै चुनौती रहेको बताए ।

अभिनेत्री राउतले आफू नृत्यका विषयमा धेरै कुरा सिक्दै र सिकाउँदै जाने भएकाले यो शोको निर्णायक बन्ने चुनौती स्वीकार गरेको बताइन् ।

निष्पक्षताको लागि यो शोका निर्णायकले दिने सम्पुर्ण अंक डिजिटल बोर्डमा सार्वजनिक समेत गरिनेछ । शोको मापदण्डविपरीत अत्यधिक र न्यून अंक दिने निर्णायकलाई लाइभ शोमै स्पष्टीकरण सोधिने आयोजक संस्थाले जनाएको छ । साथै प्रतिस्पर्धीलाई गीत छनोटमा स्वतन्त्रता दिइने बताइएको छ ।

डेढ महिना चल्ने रियालिटी शो अवधिभर प्रतिस्पर्धीलाई विभिन्न गिफ्ट ह्याम्पर अनि विजेतालाई आर्कषक पुरस्कार राशीका साथै करियर विकासका लागि विभिन्न अवसर समेत प्रधान गरिनेछ । शोमा डिजिटल अडिसनमार्फत एकल, डोयट तथा ग्रुपमा समेत प्रस्तुति दिएर पठाउन सकिनेछ ।

सिने इभेन्ट स्टुडियो प्रालीको व्यानरबाट निर्माण हुने रियालिटी शोको म्यानेजमेन्ट टिममा सौगात बराल, रिया श्रेष्ठ र सौगात दंगाल, डिजाइनरमा रिसभ पोखरेल, डिजिटल मार्केटिङ्गमा दर्शन कोइराला तथा प्रमोशन संयोजकमा प्रोजेक्ट हेड मानव सिवाकोटी आफैं छन् ।