अस्कर अवार्डका लागि नेपालबाट ‘हल्कारा’ सिफारिस

काठमाडौं । अमेरिकामा आगामी वर्ष हुने अस्कर अवार्डको ९६औं संस्करणका लागि ‘हल्कारा’ लाई सिफारिस गरिएको छ ।

अन्तर्राष्ट्रिय फिचर फिल्म छनोट समिति (नेपाल) ले विक्रम सापकोटा निर्देशित चलचित्र ‘हल्कारा’ लाई अस्कर अवार्डका लागि सिफारिस गरेको हो । राजु केसी अध्यक्षतामा रहेको उक्त समितिले प्राप्त ५ चलचित्रमध्ये उक्त फिल्मलाई सिफारिस गरेको विज्ञप्तिमार्फत जानकारी गराइएको हो ।

नेपालको अन्तर्राष्ट्रिय फिचर फिल्म छनोट समितिले प्रतिस्पर्धामा सामेल हुन इच्छुक फिल्मकर्मीलाई असोज २९ सम्मको म्याद दिएर फिल्म बुझाउन आग्रह गरेको थियो । समितिको आव्हानअनुसार ‘डाकिनी’, ‘हल्कारा’, ‘नीरफूल’, ‘बुलाकी’ र बगानले आवेदन दिएका थिए ।

प्रतिस्पर्धाका लागि प्राप्त चलचित्रमध्ये प्राविधिक पक्ष, कथ्यको प्रस्तुति, कलान्तक बनोट, चरित्रहरूको भावनात्मक विश्लेषण पक्ष तथा प्रस्तुतिको कलात्मक बनोटलाई ध्यान दिएर नेपालको प्रतियोगीका रूपमा ‘हल्कारा’ लाई सामेल गराउने निर्णय भएको विज्ञप्तिमा जनाइएको छ ।

‘हल्कारा’ मा महेश त्रिपाठी र विनिता थापा मगरको मुख्य अभिनय छ ।

त्रिपाठीले वर्ल्डफेस्ट ह्युस्टन अन्तर्राष्ट्रिय फिल्म फेस्टिभलबाट पनि सर्वश्रेष्ठ अभिनेताको पुरस्कार जितेका थिए भने चिन्तन राजभण्डारीले सर्वश्रेष्ठ छायांकारको उपाधि हासिल गरेका थिए ।