‘किलिमन्जारो’ को अफ्रिका विमोचन तथा परिचर्चा

काठमाडौ् । अन्तर्राष्ट्रिय नेपाली साहित्य समाज (अनेसास) अफ्रिका च्याप्टरको साहित्यिक प्रकाशन अफ्रिका महादेशीय नेपाली श्रष्टाहरूको सिर्जनाको सङ्गालो ‘किलिमन्जारो’ को अफ्रिका विमोचन तथा पुस्तक परिचर्चा पूर्वी अफ्रिकी मुलुक सेसेल्सको राजधानी माहे आइल्याण्ड, भिक्टोरियामा सम्पन्न भएको छ ।

हरितालिका तीजको अवसर पारेर आइतबार आयोजना गरिएको उक्त कार्यक्रम गैरआवासीय नेपाली संघ सेसेल्सको आयोजना तथा अन्तर्राष्ट्रिय नेपाली साहित्य समाज (अनेसास) अफ्रिका च्याप्टरको सहकार्यमा भएको थियो ।

एनआरएनए सेसेल्सका अध्यक्ष मनोज विकको सभापतित्वमा भएको कार्यक्रममा प्रमुख अतिथि एनआरएनए आइसीसी महिला उपाध्यक्ष एस्मिन बेगम, विशेष अतिथि महिला सचिव राधिका गुरुङ तथा अतिथिहरुमा युवा उपाध्यक्ष रोशन थापा र अफ्रिका क्षेत्रीय उप-संयोजक रामप्रसाद पन्तले भर्चुअलरूपमा शुभकामना मन्तव्य दिएका थिए ।

प्रत्यक्ष उपस्थितिका अतिथिहरूमा अनेसास अफ्रिका च्याप्टरका अध्यक्ष तथा विमोचित पुस्तक ‘किलिमन्जारो’ का प्रधानसम्पादक गणेश खड्का, अनेसास अफ्रिका च्याप्टर कार्यसमिति सदस्य तथा एनआरएनए सेसेल्स संरक्षक रामचन्द्र राई, एनआरएनए सेसेल्स प्रमुख सल्लाहकार दुर्गाबहादुर थापा साथै सेसेल्सका समाजसेवी तथा नेपाल जानकार मिस्टर लुइसेल कन्स्ट्यान्स थिए ।

विमोचित पुस्तक परिचर्चा गर्दै अनेसास अफ्रिका च्याप्टर अध्यक्ष गणेश खड्काले उक्त पुस्तकको नेपाल विमोचन २०७९ मङ्सिरमै नेपाल प्रज्ञाप्रतिष्ठानमा भएको तर पुस्तकमा अफ्रिका महादेशीय नेपाली श्रष्टाहरुका सिर्जना समेटिएकोले पनि यसको अफ्रिका विमोचन गर्नु आवश्यकता महसुस भएको बताए ।

कार्यक्रममा करिब तीन सय जना आप्रवासी नेपाली उपस्थित थिए ।