नेपालको पूर्वाधार विकासमा साउदीको चासो, मन्त्री ज्वाला र राजदूत हमिदबीच छलफल

काठमाडौं । भौतिक पूर्वाधार तथा यातायातमन्त्री प्रकाश ज्वाला र नेपालका लागि साउदी अरबका राजदूत साद नासिर अब्दुल्लाह अबु हमिदबीच पूर्वाधार विकास र आयोजना साझेदारीका विषयमा छलफल भएको छ ।

बुधबार भएको भेटवार्तामा मन्त्री ज्वालाले साउदी अरब रोजगारीको गन्तव्य भएको भएको बताउँदै अब भौतिक पूर्वाधार र यातायातका क्षेत्रमा पनि साझेदारी गर्नुपर्ने बताए ।

‘साउदीमा नेपालीहरुको श्रमले ठूलो भौतिक विकास भएको छ, त्यहाँको स्रोत, साधन र टेक्नोलोजी नेपालको भौतिक विकासमा आवश्यक छ’, मन्त्री ज्वालाले भने, ‘साउदी अरबमा करिब ४ लाख नेपाली कामदारले श्रम गरिरहेका छन् । उनीहरुले पनि केही दक्षता पाएकै छन् । त्यो दक्षता भौतिक विकासमा लगाउन हामी तयार छौं, त्यसका लागि साउद सरकारको सहयोग हामीलाई आवश्यक छ ।’

साउदी सरकारले साउदी विकास कोष मार्फत नेपालको भौतिक पूर्वाधारको विकासमा सहयोग गरेको भन्दै मन्त्री ज्वालाले विकास परियोजना बढाउन आग्रह गरे । ‘नेपाल सन् २०२६ मा अतिकम विकसित मुलुकबाट विकसित मुलुकमा स्तरउन्नति हुँदैछ, त्यसका लागि विकासलाई तिव्रता र दिगोपना सुनिश्चित गर्न पूर्वाधार क्षेत्रमा थप लगानी र सहायता आवश्यक छ’, मन्त्री ज्वालाले भने ।

साउदी राजदूत हमिदले नेपालको पूर्वाधार तथा यातायातका क्षेत्रमा सहकार्य गर्न आफुहरु तयार रहेको बताए । ‘पूर्वाधार विकासमा साझेदारी गर्न हाम्रो देश तयार छ, तर त्यसका लागि ठोस प्रस्ताव नेपाल सरकारले दिनु पर्यो’, राजदुत हमिदले भने ।

साउदी अरेबियाले वल्ड एक्सपो २०३० आयोजना गर्नका लागि उम्मेदवारी दिएको छ । साउदीसँगै दक्षिण कोरिया र इटालीले पनि आयोजनाका लागि उम्मेदवारी दिएका छन् । तर नेपालले साउदी अरबलाई सहयोग गर्ने निर्णय गरिसकेको मन्त्री ज्वालाले बताए ।