प्रधानमन्त्री प्रचण्डले भने- अग्निपरीक्षामा छौं, कसैलाई दम्भ गर्ने छुट छैन (भिडिओ)

काठमाडौं । प्रधानमन्त्री पुष्पकमल दाहाल ‘प्रचण्ड’ले आफूहरु अहिले जनताको अग्निपरीक्षामा रहेको बताएका छन्।

नेपाल हस्तकला महासंघको साधारणसभालाई सम्बोधन गर्दै उनले यो पटक राम्रो काम गरेर देखाउने, भाषण कम गर्ने पक्षमा रहेको बताए।

उनले भने, ‘म राम्रा काममात्रै गर्ने, नराम्रो काम गर्दा पनि नगर्ने । गर्न पनि नदिने यो अठोटका साथ तेस्रो पटक प्रधानमन्त्री भएको छ । मैले यसलाई ठूलो अग्निपरीक्षाको रूपमा लिएको छु । धेरै ठूलो संघर्ष र बलिदानबाट संविधानसभा बन्यो । समावेश समानुपातिक मान्यताको संघीय लोकतान्त्रिक गणतन्त्र, घोषणा भयो ।’

संविधान घोषणा भएपछि जनताको आर्थिक जीवनमा अपेक्षित सुधार नभएकोप्रति जनताको मनमा प्रश्न उब्जिएको बताए ।

उनले भने, ‘अहिले प्रतिनिधिसभामा जस्तो बनोट देखिन्छ । एकातिर जनताहरूमा पार्टी र नेतृत्वप्रति निराशा पनि झल्किन्छ । अर्कोतिर जनताले एकपटक मौका दिनुपर्छ भनेर ठूलो विवेक प्रयोग गरेको पनि देखिन्छ । कसैलाईै निषेध र कसैलाई दम्भ गर्ने छुट दिएको छैन । काम गर्ने चेतावनीसहितको अवसर दिएकाले मैले यो कुरालाई नेता र पार्टीहरुलाई जनताले राम्रै अग्निपरिक्षामा राखेका छन् । यहाँ पास हुनैपर्छ ।’