माओवादीको ‘बटमलाइन’- शान्ति सम्झौताको हस्ताक्षरकर्ताका भूमिकाले प्रचण्ड प्रधानमन्त्री

काठमाडौं । सत्ता गठबन्धनमा नेकपा माओवादी केन्द्रले प्रधानमन्त्रीको दाबी गरेको छ । सरकार गठनको विषयमा गठबन्धन दलमा जोडघटाउ चलिरहेको बेलामा माओवादीले अध्यक्ष पुष्पकमल दाहाल प्रचण्डलाई प्रधानमन्त्री बनाउन खोजेको हो ।

शुक्रबार काठमाडौंमा आयोजित एक कार्यक्रममा बोल्दै महासचिव देव गुरुङले अब वृहत शान्ति सम्झौताको हस्ताक्षरकर्ताको भूमिकाले पनि प्रचण्ड प्रधानमन्त्री हुनुपर्ने मत राखे ।

उनले भने, ‘नर्मल अवस्थामा सरकारको जसले नेतृत्व गरेपनि हुन्छ । संकट पैदा भइसकेको बेलामा अहिलेको परिवर्तनका संवाहक भनेको दशवर्षे जनयुद्ध हुँदै वृहत शान्ति सम्झौता भएपनि नै परिवर्तनको प्रक्रिया सुरु भएको छ । यसको जग नै वृहत शान्ति सम्झौता हो । त्यसैले देशलाई संकट परेको बेलामा बचाउने भनेका नै शान्ति सम्झौताका हस्तारक्षकर्ता नै हुन् ।’

उनले देशको अभिभावक र संरक्षकर्ता नै प्रचण्ड भएको बताए ।

‘यो परिवर्तनको संवाहक र मुलुकको अभिभावक पनि उहाँहरु हो । यतिबेला गिरिजाप्रसाद कोइराला हुनुहुन्न । एउटा सिंगो प्रचण्डमात्रै बाँकी हुनुहुन्छ । संकटपर्दाको अवस्थामा स्टेटमेन्टसिप लिएका पात्रहरु अघि बढ्ने कि नबढ्ने भन्ने प्रश्न छ’ उनले भने ।

अहिले मुलुकको संकटमा परेको बेलामा अभिभावकको रुपमा प्रचण्डले व्यवस्थाको प्रस्तावक, मुलुकको व्यवस्थाको संरक्षकको रुपमा अगाडि बढ्नुपर्ने उनको भनाइ छ ।

‘अहिलेको जस्तो संकट रोक्न माओवादी, चिन्तन, दृष्टिकोणबाट अघि बढ्नुपर्छ भन्ने मान्यता हो। संसदमा त्रिशंकुको अवस्था छ । त्यसले सम्झौता, सहमतिको बाटो नगइ सहमति हुँदैन । सहमति र सम्झौताको बाटो खोज्न माओवादी तयार छ’ उनले भने ।

माओवादीको विकल्प खोज्दा अहिलेको व्यवस्था बचाउन को तयार हुन्छ? भनेर प्रश्न गरेका छन् ।