माओवादीले बाबुरामलाई दियो संघ-प्रदेशमा ६ सीट, छोरी प्रत्यक्ष लड्दा बुहारी समानुपातिकमा

काठमाडौं । सत्ता गठबन्धनमा माओवादी केन्द्रकै हिस्सा बनेर प्रवेश गरेको डा.बाबुराम भट्टराई नेतृत्वको नेपाल समाजवादी पार्टीले प्रतिनिधिसभामा २ सीट र प्रदेशसभातर्फ ४ सीट पाएको छ ।

नेपाल समाजवादी पार्टीले प्रतिनिधिसभामा गठबन्धनबाट सर्लाही २ मा महिन्द्र राय यादव र काठमाडौं ७ मा मानुषी यमी भट्टराईलाई उम्मेदवार बनाएको छ । उनीहरु दुवैजनाले माओवादीको चुनाव चिन्ह प्रयोग गरेका छन् ।

त्यस्तै प्रदेशतर्फ गंगानारायण श्रेष्ठ सिन्धुली २ (ख), फणिन्द्र देवकोटा गोरखा २ (क), चिनक कुर्मी नवलपरासी पश्चिम २ (क) र सुनिल साह सर्लाही २ (क) रहेका छन् ।

समानुपातिकतर्फ बाबुरामकी भाइबुहारी दुर्गादेवी न्यौपाने भट्टराई, ईश्वर रिजाल, उमरावतीदेवी यादव र दुर्गा सोव छन् । सोब र न्यौपाने आआफ्नो क्लस्टरको माथिल्लो नम्बरमा रहेकाले उनीहरु सांसद हुने लगभग निश्चित छ ।