कांग्रेस छाडेका भैरहवाका प्रभावशाली नेता मातृका यादव जसपामा प्रवेश, मेयर उम्मेदवार बन्दै

रूपन्देही । नेपाली कांग्रेस छाडेका रूपन्देहीका नेता तथा पूर्वक्षेत्रीय सभापति मातृकाप्रसाद यादव जनता समाजवादी पार्टी (जसपा) प्रवेश गरेका छन् ।

शुक्रबार लुम्बिनी प्रदेशका भौतिक पूर्वाधार विकास मन्त्री सहसराम यादवले उनलाई पार्टी प्रवेश गराएका हुन् ।

स्थानीय तहको टिकट वितरणमा नेपाली कांग्रेसले पुरानो नेतालाई भन्दा नवप्रवेशीलाई प्राथमिकता देखाएको भन्दै उनले पार्टी परित्याग गरेका थिए । भैरहवास्थित सिद्वार्थनगर नगरपालिकामा यादव कांग्रेसबाट मेयरका आकांक्षी थिए ।

गत स्थानीय तहको निर्वाचनमा पनि सिद्धार्थनगर नगरपालिकाको प्रमुख पदको उम्मेदवार भइ उनी पराजित भएका थिए । पार्टीको क्षेत्रीय अधिवेशनमा पनि उनी क्षेत्रीय सभापति पदमा पराजित भए ।

उनी कांग्रेसबाट अघिल्लो निर्वाचनमा पनि प्रत्यासी थिए । यादव जसपा प्रवेश गरेपछि उनी अब सोही पार्टीबाट नगर प्रमुख पदको उम्मेदवार हुने जनता समाजवादी पार्टीका नेता किस्मत विश्वकर्माले जानकारी दिएका छन् ।