प्रदेश मन्त्रालयका सचिव अधिकारीसहित चार जनाविरुद्ध भ्रष्टाचार मुद्दा

काठमाडौं । लुम्बिनी प्रदेशका तत्कालीन सचिव वैकुण्ठ अधिकारीसहित ४ जना र एक संस्थाविरुद्ध अख्तियार दुरुपयोग अनुसन्धान आयोगले मंगलबार विशेष अदालतमा मुद्दा दायर गरेको छ ।

प्रदेश भूमि व्यवस्था, कृषि तथा सहकारी मन्त्रालयको कृषि यान्त्रिकीकरण कार्यक्रमअन्तर्गत उनीहरूले आपूर्तिकर्तासँग मिलेर भ्रष्टाचार गरेको आरोप लगाइएको छ ।

आपूर्तिको जिम्मा लिएको आधुनिक कृषि किसान संस्था प्रालीले भारतीय कम्पनीको सामानको ठाउँमा चाइनिज सामान उपलब्ध गराएको अख्तियारको दाबी छ ।

मन्त्रालयका तत्कालीन महाशाखा प्रमुख श्रीधर ज्ञवाली, कृषि प्रसार अधिकृत मुकेश राम्जाली र आधुनिक कृषि किसान संस्था प्रालीका प्रबन्ध निर्देशक राजाराम तिवारीविरुद्ध अभियोग पत्र दर्ता भएको छ ।

मन्त्रालयका तीन कर्मचारीविरुद्ध ३७ लाख १५ हजार बिगो माग गरिएको छ भने आपूर्तिकर्ता संस्था र त्यसका प्रबन्ध निर्देशकविरुद्ध ४३ लाख ३७ हजार ५ सय रुपैयाँ बिगो दाबी गरिएको छ।