एमालेसँग तालमेल हुने स्थानीय तहमा राप्रपा नेपालका उम्मेदवारले सूर्य चिन्ह रोज्न पाउने

काठमाडौं । राप्रपा नेपालले स्थानीय तह निर्वाचनमा नेकपा एमालेसँग तालमेल भएका ठाउँमा सो पार्टीका उम्मेदवारलाई सूर्य चिन्हबाटै उम्मेदवार बन्न बाटो खुला गरेको छ ।

स्थानीय चुनावको घोषणापत्र सार्वजनिक गर्दै अध्यक्ष कमल थापाले एमालेसँग तालमेलका लागि आफूहरु इच्छुक रहेको भन्दै त्यस्ता स्थानीय तहमा उठ्ने राप्रपा नेपालका उम्मेदवारले सूर्य चिन्हबाटै लड्न सक्ने बताएका छन् ।

जहाँ राप्रपा नेपालको उपस्थिति छ ती ठाउँमा एमालेसँग आफ्नो हैसियत अनुसार सिट मागेर एमालेकै चुनाव चिन्ह लिएर उठ्ने पार्टीको धारणा रहेको थापाले बताए ।

एमालेसँग तालमेलको कुरा भए पनि निर्णय भने नभएको उनले बताए । हेटौंडा उपमहानगरपालिका लगायत कतिपय स्थानीय तहमा राप्रपा नेपालको उपस्थिति निर्णायक रहेको छ ।

सुर्य चिन्ह जनतामा स्थापित र लोकप्रिय रहेको तथा फरक चिन्हमा मतदान गर्दा मतदाता झुक्किएर बदर हुने भएकाले पनि यो उपाय रोजिएको थापाको भनाइ छ ।