बक्सअफिस : भ्यालेन्टाइन डेले जोगाउला ‘चपली हाइट ३’ ?

काठमाडौं । चल्दाचल्दै हल बन्द भएपछि प्रदर्शन स्थगित गरेको फिल्म ‘चपली हाइट ३’ आइतबारदेखि पुनः रिलिज हुने भएको छ ।

निर्माण कम्पनी अर्जुन कुमार फिल्म्सले मंगलबार विज्ञप्ति जारी गर्दै हल खुलेसँगै फिल्म फागुन १ गतेदेखि पुनः रिलिज हुने जनाएको छ । सोमबार परेको भ्यालेन्टाइन्स डेबाट फिल्मले ब्यापार राम्रो हुने आशा लिएको छ ।

‘मैले यसलाई दोस्रो मौकाको रुपमा लिएको छु’ निर्माता अर्जुन कुमारले विज्ञप्तिमा भनेका छन् । निकेश खड्का निर्देशित फिल्म चपली हाइट ३ मा अर्पण थापा र स्वस्तिमा खड्काको मुख्य भूमिका छ ।

कोरोनाको तेस्रो लहरको कारण हल बन्द गर्ने सरकारी निर्णयसँगै चपली हाइटको तेस्रो सिक्वेलले दुई दिनमै प्रदर्शन स्थगित गर्नुपरेको थियो । प्रशासनको उक्त निर्णयले फिल्मलाई ठूलै आर्थिक धक्का पुगेको थियो ।

तर, भ्यालेन्टाइन्स डे छेकोमा नयाँ फिल्म रिलिज नहुने भएपछि यसको फाइदा चपली हाइटले लिने आशा गरिएको छ । हल खुलेसँगै स्पाइडरम्यान, पुष्पा र कठ्पुतली पनि प्रदर्शनमा आउने तयारीमा छन् ।