रेशम चौधरी भन्छन्- पुराना दलहरूले मलाई जेलभित्रै सडाउन चाहेका छन् (भिडिओ)

जनकपुरधाम । नागरिक उन्मुक्ति पार्टीका संरक्षक रेशमलाल चौधरीले आफूलाई पुराना दलहरूले पुन: जेल पठाउन षड्यन्त्र गरिरहेको आरोप लगाउका छन् ।

रिगलको आममाफी बदरसँगै रेशम पनि जेल जानसक्ने चर्चा भइरहँदा उनले टीकापुरमा आफ्नो दोष भगवान्‌ले पनि पुष्टि गर्न नसक्ने जिकिर गरे ।

केहीदिन अगाडि धनुषा आएका उनले सञ्चारकर्मीसँग भने- ‘म मेरो मुद्दाबारे धेरै भन्न चाहन्न । ईश्वर छन् भने मलाई लाग्छ यो देशमा यो  संसारमा जिसस क्राइस्ट, बुद्ध, ब्रम्हा, विष्णु, महेश, शिव भगवान् कसैले पनि मेरो दोषलाई प्रमाणित गर्न सक्दैनन् ।’

घटना संलग्नता रहेकाले दोषी ठहर भयो र राजनीति दबाबमा राष्ट्रपतिबाट माफी पाए भन्ने भनिन्छ नी ? भन्ने जिज्ञासामा उनले प्रतिप्रश्न गरे, ‘त्यसो भए रेशम चौधरी कारागारमा झुण्डिएको हेर्न चाहनुहुन्छ ? के रेशम चौधरीको मृत्यु कारागारमै भइदिए थपडी बजाउन चाहनुहुन्छ ?’

उनले पुराना दलहरु आफूलाई जेल राखिराख्न चाहेको पनि बताए ।

‘मधेसका राजवन्दीहरुलाई अझै छाडिएको छैन,’ चौधरीले भने, ‘उनीहरू (पुराना दलहरूले) त रेशम चौधरी जेलभित्रै सडिरहोस् चाहेकै छन् ।’

उनले साढे ८ वर्ष जेल बस्ने पाँच औंलामा गन्दा आफू पनि पर्ने बताउँछन् । राज्यले सतायो तर त्यसभित्र अधिकार खोज्ने क्रममा जनताले दिएको सहमतिले आफू रिहा भएको उनले भनाई छ ।

राष्ट्रपतिबाट आममाफी पाएर रिहा भएको ५ महिनापछि नागरिक उन्मुक्ति पार्टीका संरक्षक रेशम चौधरी पुनः जेल जाने चर्चा चल्न थालेको छ ।