निर्वाचन आचारसंहिता पालनामा ध्यान दिन प्रधानमन्त्रीको आग्रह (भिडिओ)

काठमाडौं । प्रधानमन्त्री शेरबहादुर देउवाले निर्वाचनसम्बन्धी आचारसंहिताको पालनामा ध्यान दिन आग्रह गरेका छन् ।

मंगलबार शहरी विकास मन्त्रालयले काठमाडौंमा आयोजना गरेका राष्ट्रिय शहरी नीति, शहरी विकास ऐन र युटिलिटी करिडोर ऐन तर्जुमासम्बन्धी परामर्श गोष्ठीको उद्घाटन गर्दै उनले निर्वाचनसम्बन्धी आचारसंहिता लागू भइसकेकाले त्यसलाई ध्यान दिन सबैलाई आग्रह गरे ।

आगामी दिनमा सरकारी कार्यक्रमहरू आचारसंहितालाई ध्यानमा राखेर गर्नुपर्नेमा प्रधानमन्त्रीको जोड छ ।

प्रधानमन्त्री देउवाले युटिलिटी करिडोरको अवधारणा कार्यान्वयन गर्न ठूला शहरमा आगामी वर्षदेखि नै पाइलट प्रोजेक्ट सुरू गरिने जानकारी गराए ।

शहरीकरणमा देखिएमा समस्या तथा चुनौतीहरूलाई सम्बोधन गर्न नयाँ शहरी नीतिमार्फत समुन्नत राष्ट्रिय शहरी विकास र शहरी प्रणालीको विकास गर्नुपर्ने देउवाले बताए ।

उनले काठमाडौं उपत्यकामा देखिएका फोहोर व्यवस्थापनको समस्या समाधानका लागि फोहरबाट ऊर्जा उत्सर्जनमा मन्त्रालयले ध्यान दिनुपर्ने उल्लेख गरेका छन् ।