कांग्रेस सभामा लिङदेनको प्रस्ताव- राजसंस्था फर्काऊँ, पूर्णसमानुपातिक संसद बनाऊँ (भिडिओ)

काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङदेनमा देशको राजनीति लिकबाहिर पुगेको भन्दै यसलाई सच्याएर जानुपर्ने बताएका छन् । सरकार सरकारजस्तो, संसद संसदजस्तो र अदालत अदालतजस्तो नभएको उनले टिप्पणी गरे ।

नेपाली कांग्रेसको १४ औं राष्ट्रिय महाधिवेशनमा अतिथिका रुपमा सम्वोधन गर्दै लिङदेनले भने, ‘सबै कुरालाई ठीक लगाउनुपर्ने राजनीतिले हो तर राजनीति नै ठीक ठाउँमा छैन । नेताहरूले विश्वास गुमाएका छन् । कांग्रेसको महाधिवेशनले नेतृत्वको विग्रेको छवि सुधार्ने अवसर जुराओस भन्ने शुभकामना दिन चाहन्छु ।’

लिङदेनले अब देशमा राष्ट्रप्रमुखका रूपमा राजसंस्थालाई ल्याउनुपर्ने प्रस्ताव गरे ।

उनले भने, ‘राष्ट्रप्रमुखका रुपमा राजसंस्था, सोझै निर्वाचित प्रधानमन्त्री, पूर्णसमानुपातिक संसद ल्याऊँ । अनि, संसदले मन्त्री हुन नपाउने नयाँ व्यवस्था लागू गरौं । त्यसपछि राजनीति ठीक बाटोमा आउँछ ।’