लुँडोको उदाहरण दिँदै योगेशले भने- एकैचाेटि माथि चढे खस्न सकिन्छ, सचिवमै दोहोरिन्छु

चितवन । नेकपा एमालेका सचिव तथा प्रचार विभाग प्रमुख योगश भट्टराईले आफू पुनः सचिवमा दोहोरिने बताएका छन् ।

भरतपुर विमानस्थलमा सञ्चारकर्मीहरुसँग कुरा गर्दै भट्टराईले १० औं महाधिवेशनमा आफू पुनः सचिवमा दोहोरिन चाहेको बताएका हुन् ।

पार्टीको कार्यकारी भूमिकामा बस्न अझै १५ वर्ष बाँकी रहेको उल्लेख गर्दै उनले एकैपटक माथि चढ्न खोजे लुँडाे खेलमा जस्तै लडिने सम्भावना रहेको बताए ।

‘लामो यात्रामा दौड्दा कहिलेकाँही चौतारीमा बस्नुपर्छ । यसपालि चौतारीमा बस्ने हो (सचिवमा)’, उनले भने- ‘त्यसपछि फेरि अगाडि बढ्न मलाई अझै १५ वर्षको सुविधा छ । धेरै माथि चढियो भने, लुँडो खेलमा जस्तो तल खस्ने सम्भावना हुन्छ ।’

नेकपा एमालेको महाधिवेशन १० देखि १२ मंसिरसम्म चितवनमा आयोजना हुँदैछ । महाधिवेशनका लागि भट्टराई चितवन पुगेका हुन् ।