देश फर्कने वातावरण मिलाउन भन्दै पाकिस्तानका नेपाली विद्यार्थीले लेखे परराष्ट्रलाई पत्र

काठमाडौं । पाकिस्तानमा डाक्टर पढिरहेका नेपाली विद्यार्थीले तत्काल स्वदेश फर्कनको लागि वातावरण मिलाउन परराष्ट्र मन्त्रालयलाई पत्राचार गरेका छन् । उनीहरुले सीधा हवाई उडान नभएकाले भारत-पाकिस्तानको वाघा-अटारी सीमा हुँदै स्वदेश फर्कने व्यवस्था मिलाउन आग्रह गरेका हुन् ।

पाकिस्तानमा रहेका नेपाली चिकित्सकको संगठन ‘सोसाइट अफ नेप्लिज डक्टर फ्रम पाकिस्तान’ले परराष्ट्र मन्त्रालयलाई यसै साता पत्र लेखेको अन्तर्राष्ट्रिय समन्वय कोअर्डिनेटर डा. तुलाराम यादवले जानकारी दिए।

पाकिस्तानमा रहेका विद्यार्थीले आर्थिक समस्याका कारण चार्टर विमानमा आउन समस्या भएकाले उद्धार गर्नका लागि आग्रह गरेका छन् । चाडपर्व नजिकिरहेको भन्दै उनीहरुले परराष्ट्र मन्त्रालयका अधिकारीहरुलाई स्वदेश फर्किने अनुमतिको व्यवस्था मिलाइदिन आग्रह गरेका हुन्।