देउवालाई माधवको सुझाव- क्षमतावान सहयोद्धाहरू लिएर काम गर्नुस् (भिडियो)

काठमाडौं । सत्तारुढ गठबन्धनको घटकमध्येका एक एमाले माधव समूहका नेता माधवकुमार नेपालले प्रधानमन्त्री शेरबहादुर देउवालाई क्षमतावान व्यक्तिलाई साथ लिएर काम गर्न सुझाव दिएका छन् ।

विश्व बाघ दिवसको अवसरमा बिहीबार बालुवाटारमा आयोजित कार्यक्रममा नेपालले भने ‘प्रधानमन्त्रीमात्रै पर्याप्त हुँदो रहेनछ । सहयोगी, सहयोद्धाहरु पनि त्यस्तै काविल चाहिन्छ । समर्पित चाहिन्छ । रचनात्मक चाहिन्छ ।’

आफू प्रधानमन्त्री रहँदा सहयोद्धाहरू राम्रो भएकाले प्रकृति संरक्षणको सम्बन्धमा राम्रो काम गर्न सकेको भन्दै त्यसप्रति आफूलाई आनन्द र गौरवबोध हुने उनले दावी गरे ।

कार्यक्रममा प्रधानमन्त्री देउवाले बाघको बासस्थानका लागि जंगल आवश्यक रहेको र जंगल जोगाउने तर्फ ध्यान दिनुपर्ने आवश्यकतामा जोड दिए । उनले भने, ‘बाघको लागि जंगल आवश्यक छ । जंगल र बाघ एक अर्काको लागि आवश्यक कुरा हुन् । बाघको बासस्थान सुरक्षित गर्न विशेष ध्यान दिनुपर्छ ।’