लकडाउनमा निर्वाध हिँड्डुलको व्यवस्था गर्न कानून व्यवसायीको माग

काठमाडौं । नेपाल बार एसोसियसनले लकडाउनको समयमा कानून व्यवसायीहरूलाई आवागमनमा बाधा नहुने व्यवस्था गर्न माग गरेको छ ।

बारका महासचिव अधिवक्ता लीलामणि पौडेलले गृह मन्त्रालयलाई पत्राचार गर्दै कानून व्यवसायीहरूको सेवा पनि अत्यावश्यक सेवाअन्तर्गत पर्ने भएकोले परिचयपत्र, कालो कोट र बारको लोगोधारी कानून व्यवसायीलाई कुनै अवरोध नगरी आवागमनमा सहयोग पुर्‍याउने व्यवस्थाका लागि मातहतका कार्यालयलाई निर्देशन एवं परिपत्र गरिदिन अनुरोध गरेका हुन् ।

पत्रमा हरेक अदालती कामकारवाही पूर्ण रुपमा स्थगन हुने अवस्था नरहेको र न्यायिक सेवा लिन चाहने नागरिकलाई सेवा दिन कानून व्यवसायीहरू कार्यक्षेत्रमा उपस्थित हुनुपर्ने भएकोले सहज वातावरण बनाइदिन अनुरोध गरिएको छ ।