दोस्रो दल बन्ने लक्ष्य राखेको माओवादी ४३ क्षेत्रमा सिमित, भागको ५ सीट पनि अरुलाई सुम्पियो (सूचीसहित)

काठमाडौं । सत्ता गठबन्धनको असोज २१ गते रातिको अन्तिम भागवण्डामा मधेस प्रदेशका केही क्षेत्र लोसपालाई छाड्नेबाहेकको सीट बाँडफाँटमा ४८ सीट पाएको माओवादी केन्द्रले अन्तिममा ४२ ठाउँमा उम्मेदवारी दियो ।

दिएका ४३ मध्ये पनि रौतहट ३ का उम्मेदवार रविन्द्र पट्टेलको उम्मेदवारी निष्क्रिय बनाएर एमालेबाट स्वतन्त्र बनेका प्रभु साहलाई समर्थन जनाएपछि अब १६५ निर्वाचन क्षेत्रमध्ये ४३ ठाउँमा मात्र माओवादीका उम्मेदवार कायम भएका छन् ।

ती ४३ मध्ये काठमाडौं ७ की मानुषी यमी भट्टराई र सर्लाही २ का महिन्द्र राय यादव बाबुराम भट्टराई नेतृत्वको नेपाल समाजवादी पार्टीका उम्मेदवार हुन् ।

कमल थापाले सूर्य चिन्ह लिएर लडेजस्तै उनीहरुले माओवादीको चिन्ह प्रयोग गरेका हुन् । उनीहरुलाई समेत जोड्दा ४३ जना उम्मेदवार मैदानमा पठाएको माओवादीका आफ्नै पार्टीका उम्मेदवार भने अब ४१ जनामात्र बाँकी रहेका छन् ।

माओवादी केन्द्रले भागवण्डामा पाएकामध्ये रुपन्देही १ मा आफ्नो उम्मेदवार नउठाएर एमालेबाट टिकट नपाएपछि स्वतन्त्र बनेका घनश्याम भुसाललाई समर्थन जनाएको छ ।

भागवण्डामा मापदण्डअनुसार नै पाएको सोलुखुम्बु पनि अन्तिममा माओवादीले कांग्रेसलाई छाडेको छ । बलवहादुर केसीले असोज २३ गते विहान बालुवाटारमै गएर प्रचण्ड र शेरबहादुर देउवा दुवैजनालाई देखाइदिन्छु भनेपछि माओवादीले छाडेको हो ।

माओवादीले जितेको सो क्षेत्र २१ गतेको भागवण्डामा उसकै भागमा थियो । तर कांग्रेस नेता केसी विहान गएर ‘यो बलेलाई टिकट नदिने होइन त प्रचण्डजी ? ल म देखाइदिन्छु’ भन्दै स्वतन्त्र उम्मेदवारी दिन हिँडेपछि छलफल भयो ।

जिल्लाका माओवादीहरुले पनि बलवहादुर केसी बागी उठ्दा जित्न नसकिने रिपोर्ट दिएपछि प्रदेशका २ वटा सीट लिएर माओवादीले प्रतिनिधिसभाको सीट कांग्रेसलाई छाड्यो ।

त्यस्तै, केन्द्रबाट म्याग्दीको सीट माओवादी केन्द्रले लियो । पार्टीले संविधानसभाको पहिलो सदस्य गोविन्द पौडेललाई टिकट पनि दियो । तर जिल्लामा कमजोर अवस्था रहेकाले सल्लाहले नै प्रतिनिधिसभाको सीट कांग्रेसलाई दिने सहमति गरेर केन्द्रमा खबर गरे ।

केन्द्रबाट अन्तिममा प्रतिनिधिसभा कांग्रेसले र प्रदेशका दुवै सीट माओवादीले पाउँने गरी पठाइयो । यस्तै, हालत नवलपुर २ पनि भयो । केन्द्रबाट माओवादीले पाएको सो सीट जिल्लाका माओवादीले लिन मानेनन् ।

अन्तिममा त्यो सीट पनि कांग्रेसलाई दिएर एउटा प्रदेशसभा लियो माओवादीले । तर त्यसो गर्दा कांग्रेसका गण्डकी प्रदेश महामन्त्री विष्णु लामिछानेले पाएको प्रदेशको सीट भने खोसियो ।

आगामी निर्वाचनपछि दोस्रो ठूलो दल बन्ने र कम्युनिष्ट पार्टीमध्ये पहिलो बन्ने घोषणा गरेको माओवादीले ४३ सीटमा चुनाव लडेर उक्त लक्ष्य प्राप्त गर्न सक्ला ? यसका लागि भने मंसिर ४ सम्म कुर्नै पर्ने हुन्छ । जबकी एमालेले १४१ स्थानमा उम्मेदवार खडा गरेको छ ।