माओवादीमा प्रस्ताव- चुनावमा गठबन्धन नगर्ने, उम्मेदवार र मन्त्री दुई कार्यकाल मात्र हुन पाउने (पूर्णपाठ)

काठमाडौं । नेकपा माओवादी केन्द्रको विधान अधिवेशनमा चुनावमा गठबन्धन नगर्ने प्रस्ताव भएको छ । समूह नम्बर १० को तर्फबाट बैठकमा पेश भको सुझावमा चुनावमा गठबन्धन नगर्ने प्रस्ताव गरिएको हो ।

समूहका नेता युवराज चौलागाईंले बागी उम्मेदवारलाई एक तह घटुवा र एक पटक टिकट नदिने नीति लिनुपर्ने प्रस्ताव गरिएको बताए ।

पार्टीभित्र सार्वजनिक पद लिएकाको सम्पत्ति छानबिन गर्नुपर्ने, केन्द्रमा जम्मा दुई तह राख्न सुझाव दिँदै ११ जनाको पदाधिकारी बनाउनुपर्ने सुझावमा उल्लेख छ ।

मन्त्री र सांसद कति पटक हुने मापदण्ड बनाउनुपर्ने, गैरआवासीय नेपालीलाई पनि पार्टी सदस्यता दिने, केन्द्रीय पदाधिकारी तथा स्थायी समितिमा सबै प्रदेशको प्रतिनिधित्व हुन पर्ने, दुई कार्यकाल उम्मेदवार र मन्त्री हुन पाउने, तीन कार्यकालमात्रै पार्टी जिम्मेवारीमा बस्न पाउने प्रस्ताव गरिएको छ ।

नेता चौलागाईंले केन्द्रीय पदाधिकारी प्रत्यक्ष निर्वाचित भएर आउनुका साथै पार्टीको नाम नेकपा समाजवादी राख्न प्रस्ताव गरिएको बताए ।