आजबाट टीकापुरमा नाउपाको पहिलो महाधिवेशन

टीकापुर । कैलालीको टीकापुरमा नागरिक उन्मुक्ति पार्टीको पहिलो महाधिवेशन सुरू हुँदैछ । आज, भोलि र पर्सिसम्म चल्ने महाधिवेशनले नयाँ नेतृत्व चयन गर्नेछ ।

नाउपाका संरक्षक रेशमलाल चौधरी पार्टीको पहिलो अधिवेशन ऐतिहासिक हुने बताउँछन् । नेपालको दलीय राजनीतिक इतिहासमै सम्भवतः सबैभन्दा धेरै प्रतिनिधिको सहभागितामा नागरिक उन्मुक्ति पार्टीको प्रथम महाधिवेशन आयोजना हुने भएको हो ।

पहिलो निर्वाचनमै उल्लेख्य जनमत पाएको नाउपालाई हिमाल, पहाड र तराईको साझा पार्टी बनाउने चौधरीको दाबी छ ।

‘देशभरबाट ८ हजार महाधिवेशन प्रतिनिधि ल्याउने तयारी गरेका छौं । ५२ जिल्लामा जिल्ला कार्यसमिति गठन भएको छ । नागरिक उन्मुक्ति पार्टीप्रति निकै राम्रो चर्चा छ उत्साह छ’ उनले भने, ‘हामी पहिलो महाधिवेशनलाई ऐतिहासिक बनाउँदै छौँ ।’

महाधिवेशनको उद्घाटन समारोहका लागि नेकपा एकीकृत समाजवादी पार्टीका अध्यक्ष तथा पूर्वप्रधानमन्त्री माधवकुमार नेपाल टीकापुर आइसकेका छन् । बाबुराम भट्टराईलगायतका नेताहरू पनि आउँदै छन् ।

प्रधानमन्त्री पुष्पकमल दाहाल ‘प्रचण्ड’ ले उद्घाटन गर्ने बताइए पनि उनी आउने सम्भावना क्षीण गरेको जनाइएको छ ।