मन्त्री र दाबी मन्त्रालयमा छलफल गर्न माओवादी प्रदेश १ संसदीय दलको बैठक बोलाइयो

विराटनगर । नेकपा माओवादी केन्द्र प्रदेश १ संसदीय दलको बैठक बोलाइएको छ । कसको नेतृत्वमा नयाँ सरकामा जाने, कुन-कुन मन्त्रालयमा दाबी गर्नेलगायतमा विषयमा बैठकमा छलफल हुने बताइएको छ ।

प्रदेशसभा सदस्य दुर्गाप्रसाद चापागाईँ ‘सचिन’ ले नयाँ सरकार गठनको विषयमा दलको बैठक बोलाइएको जानकारी दिए । संसदीय दलका नेता इन्द्रबहादुर आङ्वो र एमाले संसदीय दलका नेता हिक्मत कार्कीका बीचमा छलफल भएको भन्दै दुवै पक्षले आ-आफ्नो दलको बैठक तय गरेको उनको भनाइ छ ।

प्रदेश १ मा माओवादीका १३ सांसद छन् । संसदीय दलका नेता वर्तमान अर्थमन्त्री आङ्बोले माओवादीका भागमा मुख्यमन्त्री नपरे आफू मन्त्री नबन्ने बताउँदै आएका छन् । उनी सरकारमा नजाने भएपछि चापागाईँको नेतृत्वमा सरकारमा पठाउने माओवादीको तयारी रहेको छ । तर, जीवन आचार्यले सरकारको नेतृत्वको दाबी गरिरहेका छन् । उनी प्रधानमन्त्री एवं माओवादी अध्यक्ष पुष्पकमल दाहाल ‘प्रचण्ड’ का ज्वाइँसमेत हुन् ।

प्रदेशसभा सदस्य गणेश उप्रेती, राजेन्द्र कार्कीले पनि सरकारमा जाने दाबी गरिरहेकाले मन्त्री टुंग्याउन सकस परिरहेको माओवादीका एक नेताले बताए । संसदीय दलको वैठक नै नबसी सांसदहरूले मन्त्रालय दाबी गर्दा माओवादीभित्र विवाद उत्पन्न भएको छ ।

आफूखुसी मन्त्रालय दाबी गरेको र एकले अर्काको अस्तित्व नै स्वीकार नगर्ने अवस्था आएपछि संसदीय दलका नेता आङ्बोले फेसबुकमा संसदीय दलको बैठकले सवै विषय टुंग्याउने बताएका छन् ।