करारका कर्मचारी हटाउँदै स्थानीय सरकार ! – Nepal Press

करारका कर्मचारी हटाउँदै स्थानीय सरकार !

काठमाडौं । बाह्रबीसे नगरपालिकाले नगरपालिकाभित्र करारमा कार्यरत कर्मचारीहरुलाई साउन १ देखि हाजिर नगर्न कडा उर्दी जारी गरेको छ।

बाह्रबीसे नगरपालिकाको ११ औं नगरसभाको निर्णयानुसार करारमा कार्यरत कर्मचारीहरुलाई हटाउने निर्णय गरेको थियो । सोही निर्णयअनुसार नगरपालिकाले सूचना प्रकाशित गरेर करारका कर्मचारीहरुलाई हाजिर नगर्न भनेको छ ।

नगरपालिकाका प्रमुख प्रशासकीय अधिकृत अमरप्रकाश भट्टले हस्ताक्षर गरेको पत्रमा नगरसभाले करारका कर्मचारीहरुलाई हाजिर नगर्न, नगराउन भन्ने निर्णयपछि नगरपालिकाले सूचना जारी गरेको हो । नगरपालिकाको हाजिर कापीमै सूचना टाँसेर साउन १ देखि करारका कर्मचारीलाई हाजिर नगर्न भनेको छ ।

नगरपालिकामा विभिन्न तहमा गरी १४० बढी करारका कर्मचारी कार्यरत छन् । शिक्षक, स्वास्थ्य, कृषि, पशु, उद्योग शाखा, प्रधानमन्त्री स्वरोजगार, पन्जिकरण, पोषण सबै गरेर यो संख्यामा कर्मचारी कार्यरत छन् । जनप्रतिनिधि नयाँ आउनासाथ करारका कर्मचारी निकाल्ने नगरपालिकाले निर्णय गरेपछि करारका कर्मचारी समस्यामा परेका छन् ।

बाह्रबीसे नगरपालिकाका यसअघिका मेयर निमफुन्जो शेर्पाको कार्यकालमा नियुक्त भएका करारका कर्मचारी हटाउने निर्णय गलत भएको नेकपा एमाले सिन्धुपाल्चोकका उपसचिव एवं बाह्रबीसे नगरपालिकाकी निवर्तमान उपमेयर सुशीला पाख्रिनले बताइन् ।

अन्य स्थानीय सरकारहरुले पनि करारमा कार्यरत कर्मचारीहरुलाई हटाएर आफू निकटकाहरुलाई भर्ती गर्ने तयारी गरेका छन् ।

प्रतिक्रिया

Leave a Reply

Your email address will not be published. Required fields are marked *

सम्बन्धित खवर