रामेछाप नगरपालिकाको मेयर र उपमेयरमा एमालेका उम्मेदवार सर्वसम्मत

रामेछाप । नेकपा एमालेले रामेछाप नगरपालिकाको मेयर र उपमेयरका उम्मेदवार सर्वसम्मतरुपमा सिफारिस गरेको छ । नगर कमिटीको बैठकले मेयरमा रोशन पाख्रिन र उपमेयरमा सीता कुमारी केसीको नाम सर्वसम्मत रुपमा सिफारिस गरेको हो ।

एमालेले नगरपालिकाका मेयर र उपमेयरको टिकट भने नगर कमिटीको सिफारिस र जिल्ला कमिटीको सुझावका आधारमा प्रदेश कमिटीबाट लगाउनेछ ।

मेयरमा सिफारिस भएका पाख्रिन अघिल्लो निर्वाचनमा एक सय मतको झिनो अन्तरमा कांग्रेसका नरवहादुर मगरसँग पराजित भएका थिए । त्यसबेला उपमेयरमा सीता केसी सिफारिस भए पनि मतदाता नामावली काठमाडौंमै रहेकाले अर्को उम्मेदवार उठाउँदा त्यसको असर मेयरमा परेर एक सय मतले पराजित हुनुपरेका एमाले नेताहरु बताउँछन् ।

यसपटक सर्वसम्मत रुपमा उम्मेदवार चयन गर्दै एमाले चुनावी अभियानमा लागेको केसीले बताइन् । पाख्रिन नगर कमिटीका अध्यक्ष हुन् भने केसी जिल्ला कमिटी सदस्य हुन् । पालिका प्रमुख र उपप्रमुखको सिफारिस टुंगो लगाउने रामेछाप नगर कमिटी पहिलो बनेको जिल्ला अध्यक्ष आनन्द श्रेष्ठले बताए ।

रामेछापको वडा नम्बर ७ मा धु्रब बस्नेत र ८ मा श्याम श्रेष्ठ वडाध्यक्षका उम्मेदवार पनि सर्वसम्मत भएका छन् ।