युक्रेन आक्रमणको विरोध गर्ने रसियाली पत्रकार पक्राउ

काठमाडौं । रसियाले युक्रेनमाथि गरेको आक्रमणको विरोध गरेको भन्दै रसियाको प्रहरीले सरकारी संचारमाध्यममा कार्यरत एक कर्मचारीलाई नियन्त्रणमा लिएको छ ।

अन्तर्राष्ट्रिय संचार माध्यमहरुका अनुसार युरोपियन मुलुकले रसियामाथि लगाएको आर्थिक प्रतिबन्धको समाचार प्रसारण भइहेका बेला सम्पादक मन्डलकी ती महिला कर्मचारी ‘नो वार’ लेखेको पेपर लिएर स्टुडियो छिरेकी थिइन् ।

अर्की महिला सहकर्मीले समाचार वाचन गरिरहेका बेला उनले पछाडिबाट ’नो वार’ लेखेको पेपर देखाएकी थिइन् । लगत्तै प्राविधिकहरुले अर्को स्क्रिन परिवर्तन गरेका थिए । लगत्तै प्रहरीले उनलाई नियन्त्रणमा लिएको समाचारहरुमा उल्लेख गरिएको छ ।

रसियाले युक्रेनमाथि गरिरहेको आक्रमणको विरोध रसियाभित्रै भइरहेका बेला पछिल्लो घटना घटेको हो । रसियाले केही दिनयता युक्रेनमाथिको आक्रमणलाई निरन्तरता दिइरहेको छ ।