राजीनामा दिएका सांसद विष्ट अझै आएनन् सनाखत गर्न

सुर्खेत । नेकपा माओवादी संसदीय दल कर्णाली प्रदेशका प्रमुख सचेतक ठम्मर विष्टले सांसद पदबाट राजीनामा दिएको तीन दिन वित्दा पनि प्रदेश सभामा सनाखत गर्न आएका छैनन् ।

उनले फागुन २७ गते इमेल मार्फत प्रदेश सभामा राजीनामा पेश गरेका थिए । एमसिसि पास गरिएको, गैर सांसदलाई मन्त्री बनाइएको र पार्टीमा राजनीतिक विचलन आएको भन्दै उनले सांसद पद र नेकपा माओवादीबाट राजीनामा दिएका थिए ।

प्रदेश सभामा दिएको राजीनामा पत्रमा भनिएको छ, ‘यति मात्र नभई हजारौं कार्यकर्ता र जनताको बलीदानी भावनालाई तिलान्जली दिदै पार्टीलाई भद्धा संसदीय भासमा छिराउदै मुखमा क्रान्ति र ब्यबहारमा पतनको दिशातिर उद्धत, सत्ताको लागी जे पनि गर्ने रणनितीले जनयुद्ध, जनआन्दोलन, शहीद, घाइते, बेपत्ता परीवार र आम जनतामा निरासा मात्र होइन परीणामत आम जनतामा कुठराघात समेत गरेको पुष्टि भैसकेको छ यस्ता स्खलनका अनेक श्रृंखला मध्य एमसीसी यसैको निरन्तरताको अर्को श्रृंखला रहेको पुष्टि भैसकेको छ ।’

उनले पार्टी पुरै दक्षिणपन्थी धारमा चुर्लुम्मै डुवेको बताएका छन् ।

यता, सभामुख राजबहादुर शाहीले इमेलबाट राजीनामा पत्र प्राप्त भएको बताए । ‘उहाँले इमेलबाट राजीनामा दिनु भएको हो । राजीनामा स्वीकृत गर्न उहाँ आफै प्रदेश सभामा सनाखत गर्न आउनुपर्छ ।’ सभामुख शाहीले भने, ‘उहाँ हालसम्म सनाखत गर्न आउनु भएको छैन ।’