माधव नेपाललाई निम्तो नगरेकोमा के भने ओलीले ? (भिडिओ)

काठमाडौं । नेकपा एमालेका अध्यक्ष केपी शर्मा ओलीले फुटेर गएको नेकपा एकीकृत समाजवादी पार्टी नै नभएकोले महाधिवेशनमा निम्तो नगरिएको प्रष्ट्याएका छन् ।

१०औं महाधिवेशनको सन्दर्भमा सम्पादकसँगको अन्तर्क्रियामा ओलीले भने, ‘पार्टीका रूपमा निम्ता गर्न मिलेन । पार्टी नै होइन भने पार्टी भनेर निमन्त्रणा गर्ने कुरा भएन ।’

एमालेले पार्टी अनुशासनको कारबाही गरेका नेता नेपालसहित पार्टी प्रतिनिधिको रूपमा महाधिवेशनमा बोलाउन नसकिने ओलीको भनाइ छ ।

गत २५ साउनमा आफ्नो सरकार ढाल्ने र देशका अहितमा काम गरेका हुनाले अनुशासानको कारबाही गरेकाले नेपाललाई बोलाउन नसकिने ओलीले बताए ।

संचारमाध्यम र कलाकारबाहेक महाधिवेशनमा व्यक्तिगतरूपमा कसैलाई निम्तो नगरिएको उनले बताए ।

एमालेले दशौं राष्ट्रिय महाधिवेशनको उद्घाटन समारोहमा नेपाललगायत विभिन्न देशका दलहरूलाई निम्ता गरिसकेको छ ।

एमाले सचिव तथा प्रचार विभाग प्रमुख योगेश भट्टराईले अवैध ढंगले अध्यादेशमार्फत जन्माइएको पार्टीलाई मान्यता नदिएको भन्दै नेकपा एसलाई नबोलाउने यसअघि नै बताएका थिए ।