नवलपरासीमा मरेका गिद्धको नमूना काठमाडौं पठाइयो

नवलपरासी । पश्चिम नवलपरासीको रामग्राम नगरपालिकाक्षेत्रमा मृत फेला परेका गिद्धहरुको पोष्टमार्टम गरी परीक्षणको लागि नमूना काठमाडौं पठाइएको छ ।

एकै पटक ठूलो संख्यामा मरेका गिद्धको मृत्युको कारण पत्ता लगाउन पोष्टमार्टम गरी काठमाडौं पठाईएको हो । ६७ वटा गिद्ध मरेका भेटिएपछि गिद्धको नमूना संकलन गरी बीहीबार काठमाडौं पठाइएको नेपाल पंक्षी संरक्षण संघका ईश्वरी चौधरीले जानकारी दिए ।

प्रारम्भिकरूपमा अनुसन्धानले विषाक्त सिनो खाएकै कारण गिद्धहरुको मृत्यु भएको देखिएपनि परीक्षणपछि मात्र वास्तविक कारण पत्ता लाग्ने चौधरीले बताए ।

पश्चिम नवलपरासीका प्रमुख जिल्ला अधिकारी, गिद्ध संरक्षण मन्च, राष्ट्रिय प्रकृति संरक्षण कोष र नेपाल पन्छी संरक्षण संघका प्राविधिकसहित टोली रामग्राम क्षेत्र पुगेका थिए । मरेका सबै गिद्धहरुलाई पोष्टमार्टमपछि खाडल खनेर बुधवार सांझ नै पुरिएको छ ।

मरेको अवस्थामा फेला परेकामध्ये लोपोन्मुख प्रजातिमध्ये ३३ वटा सेतो डंगर प्रजातिका छन् । मरेकामध्ये ३१ वटा हिमाली गिद्ध र बाहिरी देशबाट आएका राजगिद्ध २ र एउटा सानो खैरो गिद्ध रहेका छन् ।

तराई क्षेत्रमा पाइने सानो खैरो गिद्ध पनि अत्यन्त थोरै संख्यामा रहेको छ ।