शुल्क नबुझाएकाे भन्दै प्रिन्सिपलले विद्यार्थीलाई आफ्नै घरमा थुने, प्रहरीद्वारा उद्धार
२०८० कार्तिक ७ गते २०:२८
जनकपुरधाम । सिरहाको लहान नगरपालिकाका-४ स्थित एक बोर्डिङले बन्धक बनाएको विद्यार्थीको प्रहरीले उद्धार गरेको छ ।
कक्षा १ मा अध्ययनरत सचिन रामलाई पाराडाइज एकेडेमीका सञ्चालकसमेत रहेका प्रिन्सिपल राकेश गुप्ताले दसैँमा फी नबुझाएको भन्दै घरमा थुनेर राखेका थिए ।
छोरा सचिनलाई स्कूलले बन्धक बनाएको भन्दै उनका बुवा दीपेन्द्रले उद्धार गरिदिन इलाका प्रहरी कार्यालय लहानलाई गुहारेका थिए । त्यहाँका डीएसपी भोला भट्ट आफैँ विद्यालय पुगेर आज बालकको उद्धार गरेको स्रोतले बतायो ।
प्रहरीले बोर्डिङ सञ्चालक राकेश गुप्तासहित तीनजनालाई नियन्त्रणमा समेत लिएको छ ।
डीएसपी भट्टले विद्यार्थीलाई उद्धार गरेको र अनुसन्धानका लागि तीनजनालाई कार्यालयमा ल्याएको बताए ।
उनले भने, ‘घटनाबारे अनुसन्धान भइरहेको छ । थप कुरा बोल्न मिल्दैन ।’
स्रोतका अनुसार बोर्डिङ सञ्चालक गुप्ता पक्राउ परेलगत्तै निजी विद्यालयका सञ्चालकहरूले छुटाउनका लागि प्रहरीलाई दबाब दिइरहेका छन् ।
(तस्बिर : प्रिन्सिपलले थुनेका विद्यार्थी र उनलाई छुटाउन पुगेका बुवा)
प्रकाशित: २०८० कार्तिक ७ गते २०:२८
प्रतिक्रिया
सम्बन्धित खवर
