अर्थव्यवस्था बिस्तारै लयमा फर्किन थालेको छ : अर्थमन्त्री महत (भिडिओ)

काठमाडाैं । अर्थमन्त्री डा. प्रकाश शरण महतले अर्थव्यवस्था बिस्तारै लयमा फर्किन थालेको बताएका छन् ।

शनिवार जनकपुरमा जनकपुरधाम उद्योग वाणिज्य संघको ५६ औँ वार्षिक साधारणसभा उद्घाटन गर्दै मन्त्री महतले विभिन्न कारणले अर्थतन्त्रमा देखिएका समस्याहरू समाधान हुँदै गएको र अर्थव्यवस्था लयमा फर्किन थालेको बताएका हुन् ।

अर्थमन्त्री डा. महतले बैङ्कहरूले व्याज दर घटाएको, रेमिट्यान्स वृद्धि भएको र पर्यटक आगमनमा वृद्धि हुँदै गएको बताए । उनले विनियोजित बजेट समयमा खर्च भएमा अर्थतन्त्रमा सकारात्मक प्रभाव पर्ने बताए ।

उनले अर्थतन्त्रमा सुधार देखिएसँगै लगानी गर्ने वातावरणको निर्माण भएको बताए । उनले सरकारमाथि आन्तरिक र बाह्य लिएको करणको सावाँ व्याज तिर्ने दायित्व बढेको उनले बताए ।

अर्थमन्त्री डा. महतले मधेश प्रदेशमा आर्थिक समृद्धिका लागि सुनकोशी मरिन कमला डाइभर्सनको काम अगाडी बढाइएको बताउँदै पूर्व पश्चिम नहर प्रणालीलाई अघि बढाउन सके उत्पादन बढ्ने जिकिर गरे ।

उनले मधेशको धार्मिक विकासका साथै पर्यटकीय स्थलको रूपमा विकास गर्न आवश्यक भौतिक पूर्वाधार निर्माणमा सरकारको ध्यान केन्द्रित रहेको धारणा राखे ।