दादुरा फैलिएपछि नेपालगन्जका शैक्षिक संस्थामा सार्वजनिक बिदा

रुपन्देही । बाँकेको नेपालगन्जमा दादुराको महामारी नरोकिएपछि शैक्षिक संस्थाहरुमा दुई सार्वजनिक बिदा दिइएको छ । पछिल्लो २४ घण्टामा ५ जना दादुराका बिरामी थपिएपछि नेपालगञ्ज उपमहानगरपालिकामा दुई सातायता ११५ जना बालबालिकामा दादु्रा संक्रमण देखिएको जिल्ला स्वास्थ्य कार्यालय बाँकेले जनाएको छ । दादुराकै कारण ३१ महिने बच्चाको मृत्यु भएको छ ।

नेपालगञ्ज उपहानगरपालिकाले दादुरा तथा रुबेला रोगको महामारी फैलनसक्ने सम्भावना देखिएको भन्दै दुईदिनका लागि सार्वजनिक विदा घोषणा गरेको उपप्रमुख कमरुद्दिन राईले जानकारी दिए । पुस २८ र २९ गते उपमहानगरपालिकाभित्र सञ्चालित सामुदायिक तथा धार्मिक विद्यालयहरुमा पूर्व निर्धारित परीक्षालाई असर नपर्ने गरी सूचना प्रकाशित गरिएको उनले बताए ।

नेपालगञ्जका ११३ र खजुराका २ जनागरी ११५ जनामा दादुरा पुष्टि भएको स्वास्थ्य कार्यालय बाँकेले जनाएको छ । दादुरा भएकामध्ये दुई जनाको अस्पतालमा उपचार भैरहेको छ भने ५८ जनालाई होमआइसोलेसनमा राखिएको छ । अस्पताल र होम आइसोलेसनमा राखिएकासहित ६२ जना उपचाररत रहेको खोप सुपरभाइजर नरेश श्रेष्ठले जानकारी दिए ।

दादुराका बिरामी बढ्न थालेपछि खोप अभियान सञ्चालन गरिएको छ । आज बिहान १० बजेदेखि साँझ ४ बजेसम्म १५ वटा खोप केन्द्रमा खोप अभियान सञ्चालन गरिएको खोप सुपरभाइजर श्रेष्ठले बताए । उनका अनुसार ८ वटा वडामा खोप कार्यक्रम सञ्चालन गरिएको हो ।

नेपालगञ्ज उपमहानगरपालिकाका १, ४, ५, ८, ११, १४ र १५ नम्बर वडामा दुई दुईवटा खोप केन्द्र सञ्चालन गरिएको छ भने ७ मा एउटा खोप केन्द्र सञ्चालन गरिएको स्वास्थ्य कार्यालय बाँकेले जानकारी दिएको छ । पुस २२ गतेदेखि २७ गतेसम्म ७ हजार १६३ जनाले खोप लिएका छन् ।

जिल्लामा ७ हजार मात्रा दादुरा-रुबेला खोप भण्डार रहेको सुपरभाइजर श्रेष्ठले बताए । यस्तै आज प्रदेश स्वास्थ्य आपूर्ति व्यवस्थापन केन्द्रबाट ३० हजार मात्रा दादुरा रुबेला खोप आइपुग्ने उनले बताए ।