विश्वकप फाइनल : फ्रान्सविरुद्ध पहिलो हाफमा अर्जेन्टिना २-० ले अघि

काठमाडौं । कतारमा जारी फिफा विश्वकप २०२२ को फाइनल खेलको पहिलो हाफमा अर्जेन्टिनाले फ्रान्सविरुद्ध २-० गोलको अग्रता बनाएको छ । लुसेल रंगशालमा जारी खेलमा अर्जेन्टिनालाई अग्रता दिलाउन कप्तान लियोनल मेस्सी र एन्जिल डी मारियाले गोल गरे ।

खेलको २३औं मिनेटमा मेस्सीले पेनाल्टी मार्फत गोल गर्दै अर्जेन्टिनालाई अग्रता दिलाएका थिए । खेलको २०औं मिनेटमा फ्रान्सका विङगर ओउस्मान डेम्बेलेले एन्जेल डिमारियालाई बक्स भित्र फाउल गरेपछि अर्जेन्टिनाले पेनाल्टी पाएको थियो । उक्त पेनाल्टीको सदुपयोग गर्दै अर्जेन्टिनाका कप्तानले सुुन्दर गोल गरे ।

डी मारियाले खेलको ३६औं मिनेटमा गोल गर्दै अर्जेन्टिनाको अग्रता दोब्बर पारेका हुन् । म्याकलिस्टरले दिएको पासलाई लेफ्ट फ्ल्याङ्कमा अनमार्क रहेका डिमारियाले सुन्दर फिनिस गरेका थिए ।

आजको खेलमा फ्रान्सलाई पराजित गरे अर्जेन्टिनाले ३६ वर्षपछि विश्वकप जित्नेछ ।

अर्जेन्टिना यसअघि अन्तिम पटक सन् २०१४ मा विश्वकपको फाइनलमा पुगेको थियो। उक्त फाइनलमा अर्जेन्टिना जर्मनीसँग पराजित भएको थियो । चार वर्षअघि फ्रान्सले फाइनलमा क्रोएसियालाई पराजित गर्दै उपाधि जितेको थियो ।

सेमिफाइनलमा अर्जेन्टिनाले क्रोएसियालाई ३-० को नतिजामा पराजित गरेको थियो। भने फ्रान्सले मोरक्कोलाई २-० को नतिजामा परातिज गर्दै फाइनलमा स्थान बनाएको थियो ।