मकवानपुर क्षेत्र नम्बर २ बाट बिरोध खतिवडाको नाम सिफारिस

हेटौँडा । नेकपा एकीकृत (समाजवादी) ले आगामी मंसिर ४ गते हुने प्रतिनिधिसभा निर्वाचनको लागि मकवानपुरको क्षेत्र नम्बर २ बाट पूर्व स्वास्थ्य मन्त्री विरोध खतिवडाको नाम सर्वसम्मत सिफारिस गरेको छ ।

शनिवार भएको क्षेत्रीय कमिटी बैठकले वर्तमान सांसद समेत रहेका खतिवडालाई प्रतिनिधिसभा उम्मेदवार बनाउने सिफारिस गरेको एकीकृत समाजवादी मकवानपुरका जिल्ला सचिव विष्णु दाहालले बताए ।

बैठकले क्षेत्र नम्बर २ को ‘क’ बाट रामचन्द्र बल तथा ‘ख’ बाट भूमिनन्द अर्याललाई  उम्मेदवार सिफारिस गरेको दाहालले बताए । बैठकले प्रतिनिधिसभाको लागि समानुपातिक तर्फ केदार न्यौपाने, मुनु सिग्देल, राजाराम स्याङ्तान तथा राष्ट्रिय सभाको लागि ललित बस्नेतको नाम सिफारिस गरेको हो ।

खतिवडा मकवानपुरबाट सर्वाधिक सांसद बनेका नेता हुन् । उनी २०४८,२०५१,२०५६ र २०७४ मा नेकपा एमालेबाट प्रतिनिधिसभा सदस्यमा विजयी भएका थिए ।