बालेनको जित लगभग सुनिश्चित, डेढ लाख भोट गन्दा कटाए ५० हजार

काठमाडौं । काठमाडौं महानगरको मेयर दौडमा स्वतन्त्र उम्मेदवार बालेन साहको जित करिब सुनिश्चित भएको छ । मतगणना उत्तरार्धमा पुग्दा उनले व्यक्तिगत भोट ५० हजार कटाएका छन् ।

हालसम्म महानगरको एक लाख ५० हजार ७२० भोटको गणना भइसकेकोमा बालेनले ५० हजार ९८ भोट ल्याएका हुन् । मुख्य प्रतिस्पर्धी कांग्रेसकी सिर्जना सिंहसँग उनको झण्डै २० हजार मतको दूरी छ । सिर्जनाले ३० हजार ७७४ मत ल्याएकी छन् । यस्तै, तेस्रो स्थानमा रहेका केशव स्थापितको २९ हजार ९९७ मत आएको छ ।

काठमाडौंमा कुल १ लाख ९१ हजार १७१ भोट खसेको थियो । त्यसमा अब ४० हजारभन्दा कम भोट गणना गर्न बाँकी छ । २१ वटा वडाको मतपरिणाम आइसकेको छ भने १० वटाको गणना जारी छ ।

वडा नम्बर १७ को भने मत गन्न सुरु भएको छैन । हाल गणना भइरहेका सबै वडाहरु कोर एरियाभित्रका छन् । यद्यपि, बालेनले विशाल अग्रता लिइसकेकाले यी वडाहरुले नतिजामा उलटफेर ल्याउने सम्भावना छैन ।